ମୋ ରାଜ୍ୟ ଓଡ଼ିଶା
ମୋ ରାଜ୍ୟ ଓଡ଼ିଶା
ଓଡ଼ିଶା ମୋର ଜନମଭୂଇଁ ସାରା ଜଗତେ ସାର
କେଡ଼େ ସୁନ୍ଦର ରାଇଜ ମୋର ସତେ ସରଗ ପୁର |
ଏଇଠି ଅଛି ଶଙ୍ଖ ଚକ୍ର ଗଦା କମଳ କ୍ଷେତ୍ର
ରକ୍ଷା କବଚ ଶ୍ରୀଜଗନ୍ନାଥ ଢାଳନ୍ତି କୃପାମୃତ |
ସାଗର ଧୁଏ ଚରଣ ଯାର ବଉଦ ସାଜେ ଗଭା
ତଟିନୀ ମାଳ ହୀରକ ହାର ଆହା କି ମନ ଲୋଭା |
ହରିତ କ୍ଷେତ କାନନ ବନ ବସନ ଆଭୂଷଣ
ଭୂଧର ମାଳା ବକ୍ଷୋଜ ସମ ଝରାଏ ପ୍ରସ୍ରବଣ |
ମେଘ ବାହନ ଖାରବେଳଙ୍କ ଦିଗ୍ ବିଜୟୀ ଗାଥା
ଖଣ୍ଡଗିରିର ପ୍ରସ୍ତର ଗୁମ୍ଫା ଦେହେ ହୋଇଛି ଲେଖା |
ଅନଙ୍ଗ ଭୀମ ବୀରତ୍ୱ ପଣ ଗାଉଛି ବାରବାଟୀ
ଲକ୍ଷ ପାଇକ ବକ୍ଷ ଶୋଣିତେ ସିକ୍ତ ଯା ବୀର ମାଟି |
ବାର ବର୍ଷର ବଢ଼େଇ ପୁଅ ମାରେ କୋଣାର୍କ ଚୂଳି
ବାଜି ରାଉତ ଦେଶ ପାଇଁକି ଦେଇଛି ପ୍ରାଣ ବଳି |
ଜୟଦେବଙ୍କ ଗୀତ ଗୋବିନ୍ଦେ ନାଚିଲେ ବନମାଳୀ
କବି ପଣରେ ଉପେନ୍ଦ୍ର ଭଞ୍ଜ ସଭିଙ୍କୁ ଗଲେ ବଳି |
ଅତିବଡ଼ିଙ୍କ ଶ୍ରୀଭାଗବତ ପୂଜିତ ଘରେ ଘରେ
ଓଡ଼ିଆ ବଧୁ ଚଉରା ମୂଳେ ସଞ୍ଜ ବତୀ ଜାଳେ |
ଓଡ଼ିଆ ଘର ବାସୀ ପଖାଳ ସହିତ ବଡ଼ି ଚୂରା
ଖାଇଛି ଯିଏ ଭୁଲିନି ସିଏ ହୋଇଛି ଆତ୍ମହରା |
ବକ୍ସି ଜୟୀ ମଧୁ ବିଜୁଙ୍କ ରାଇଜ ପରା ଏହି
ସ୍ୱାଭିମାନରେ ବଢିବା ଆମେ ନବୀନ ମନ୍ତ୍ର ଗାଇ |