ମଙ୍ଗୁଳା କନ୍ୟା

 

କେଉଁ ଜନମରେ    ପାପ କରିଥିଲି

   ଶୁଖିଲାନି ଆଖି ଲୁହ

ଦଇବ ସାଜିଲା   ବାଧକ ମୋ ପାଇଁ

   ଭରିଦେଲା ମନେ କୋହ

ବିବାହ ହେବ ମୋ  ଶୁଣି ଖୁସି ଥିଲି

 ପାଦ ତଳେ ଲାଗେ ନାହିଁ

ଆନନ୍ଦ ଉଲ୍ଲାସେ   ଫାଟି ପଡୁଥିଲା

  ମୋ ଘର ଅଗଣା ତହିଁ

ବାଡ଼ୁଅ ପାଣିରେ ଗାଧୋଇ ସାରି ମୁଁ

    ବଉଳପାଟ କୁ ପିନ୍ଧି

ମନେ ଆଶା କେତେ ବାନ୍ଧି ବସିଥିଲି

     ଆସିବ ପଗଡ଼ି ବାନ୍ଧି

ଅଚାନକ ଖୁସି   ହେଲା ପରଦେଶୀ

   ହସ ମୋ ଗଲା ମଉଳି

ଆସିଲା ଏମିତି    ଦୁଃଖଦ ଖବର

   ମନ ମୋ ଗଲା ଝାଉଁଳି

ଦୂରରୁ ଶୁଭିଲା      କ୍ରନ୍ଦନର ଧ୍ଵନି

    ବର ଗାଡ଼ି ଧକ୍କା ହେଲା

 ଅଶୁଭ ଖବର     ଆସିଲା ପାଖକୁ

     ବଜ୍ର ସତେ ପଡ଼ିଗଲା

ବାଜୁଥିଲା ଶୁଭ     ସାହାନାଇ ସ୍ୱର

     ଅଶୁଭ ସଂକେତ ନେଇ

ଫେରିଗଲେ ସବୁ     ବନ୍ଧୁ ପରିଜନ

   ଅଲକ୍ଷଣି ଆଖ୍ୟା ଦେଇ

ମଙ୍ଗୁଳା କନ୍ୟା ମୁଁ  ହୋଇ ସାରିଥିଲି

    ମୋ ମୁହଁ ଚାହିଁବା ମନା

 ସାହି ପଡିଶାରେ  ଫୁସୁରୁ ଫାସର

   ମତେ ନେଇ ଆଲୋଚନା

ବିଧିର ବିଧାନ    ବିଚିତ୍ର ସତରେ

    ଟାଳି କି ପାରିବି କେବେ

ଦୁଃଖକୁ ଆବୋରି ବଞ୍ଚିବା ମୋ ପାଇଁ

    ଭାରି କଷ୍ଟ ସାଧ୍ୟ ଏବେ

ଦୁଃଖର ପାହାଡ  ପଡ଼ିଲା ତ ଛିଡି

   ନୟନୁ ଲୋତକ ଝରେ,

ଏମିତି ଘଟଣା  କାହାରି ଜୀବନେ

   ନ ଆସୁ ପ୍ରାର୍ଥନା କରେ।।