ମହିଳା

ବିଧାତା ଗଢିଲେ ମନୁ ଶତରୂପା

ସଂସାର ବର୍ଦ୍ଧନ ଅର୍ଥେ

ଶତରୂପା ଥିଲେ ପ୍ରଥମ ମହିଳା

ଆମର ଏଇ ଜଗତେ ।

ଧର୍ମେ ରହି ନିଜ ସଂସାର ବର୍ଦ୍ଧନେ

ଉଭୟେ ହୋଇଲେ ରତ

ମାନବ ସଭ୍ୟତା ସଂରଚନା ହେଲା

ଏକଥା ପୁରାଣେ ଖ୍ୟାତ ।

ମହିଳା ଜନନୀ ଭଗିନୀ ଓ ଜାୟା

ଆଦି ନାନା ରୂପ ଧରେ 

ଆଦି ଶକତି ସେ ସୃଷ୍ଟିର ସ୍ୱରୁପ

ତା ଲାଗି ସୃଷ୍ଟି ସଞ୍ଚରେ ।

ମହିଳା ବିନା ଏ ସୃଷ୍ଟି କି ସମ୍ଭବ

ଭାବି ନିଅ ଥରେ ମନେ

ସୃଷ୍ଟି ସମ୍ଭବା ସେ ପାଳନ ପୋଷଣ

କରଇ ଆନନ୍ଦ ମନେ ।

ବକ୍ଷୁ ନିଗାଡି ସୁଧା ଧାରା ଦିଏ

ସନ୍ତାନ ରକ୍ଷଣ ପାଇଁ 

କେତେ କେତେ ରୂପ ଧରଇ ସେ ନିଜେ

ଜଗତର ହିତ ପାଇଁ ।

ଆହାର ଦିଗୁଣ ବୁଦ୍ଧି ଚାରିଗୁଣ

ବ୍ୟବସାୟ ଷଡଗୁଣ

ଆଠଗୁଣ କାମ କରଇ ମହିଳା

ଏକଥା ଶାସ୍ତ୍ର ପ୍ରମାଣ ।

ଅହଲ୍ୟା ଦ୍ରୌପଦୀ କୁନ୍ତୀ ମନ୍ଦୋଦରୀ

ତାରା ଏ ଥିଲେ ମହିଳା

ଶଚୀ ସୀତା ଅରୁନ୍ଧତୀ ଅନସୂୟା

ସଭିଏଁ ଏ ପୁଣ୍ୟଶୀଳା ।

ଦେବତା ପୃଥ୍ୱୀରେ ଲଭନ୍ତି ଜନମ

ମାତୃଶକ୍ତି ଗରଭରୁ 

ସଫଳ ପୁରୁଷ ପଛରେ ମହିଳା

ରହିଛି କାଳ କାଳରୁ ।

ରାକ୍ଷସୀର ରୂପ ଧରଇ ମହିଳା

କ୍ଷୂର୍ଣ୍ଣ ହେଲେ ସ୍ଵାଭିମାନ 

ଭଲ ଭାବେ ତୁମେ ନିରୀକ୍ଷଣ କର

ମିଥ୍ୟା ନୁହେଁ ଏ ବଚନ ।

ଆଜିର ଯୁଗରେ ପ୍ରତ୍ୟେକ କ୍ଷେତ୍ରରେ

ମହିଳା ଥାପିଛି ପାଦ

ଶୁଭ ଲକ୍ଷଣ ଏ ସମାଜ ପାଇଁକି

ନଆସିବ ପରମାଦ ।

ମହିଳା ସୁରକ୍ଷା ସଶକ୍ତିକରଣ

ସଭିଙ୍କର ହେଉ ଧ୍ୟେୟ

ଦୟାମୟଙ୍କର ସୃଷ୍ଟି ରକ୍ଷା ହେଉ

ଏ ସୃଷ୍ଟି ମଙ୍ଗଳମୟ ।