ମଧୁ ଉଦବୋଧନ

ଉତ୍କଳୀଙ୍କୁ ଡାକ ଦେଲା ଜାତିପ୍ରାଣ ମଧୁ

ଉତ୍କଳ ସନ୍ତାନେ ଉଠିବନି କିରେ ନିଦୁ l

ଜୟ କରିଥିଲେ ଦିନେ ତୋର ପୂର୍ବସୂରି

ଅଖଣ୍ଡ ଉତ୍କଳ ଗଙ୍ଗାଠାରୁ ଗୋଦାବରୀ l

ଉତ୍କଳର ନେତା ସ୍ୱୟଂ ପ୍ରଭୁ ଜଗନ୍ନାଥ

ଉତ୍କଳ ସମ୍ମାନେ ସାଜିଥିଲେ ଖଣ୍ଡାଇତ l

ତାଙ୍କ ଶ୍ରୀଚରଣେ ଯାଇ କର ପ୍ରଣିପାତ

ପ୍ରଭୁ ଉତ୍କଳ କିମ୍ପାଇଁ ଖଣ୍ଡ ବିଖଣ୍ଡିତ l

ଜାତିମେଧ ଯାଗେ ଦିଅ ସ୍ୱାର୍ଥକୁ ଆହୁତି

ନନ୍ଦିଘୋଷ ନ ଚଳିବ ସ୍ଵାର୍ଥେ ରଖି ମତି l

ତୋଷାମୋଦେ ବଢ଼ିବନି ତୁମ୍ଭ ଜାତି ମାନ

ତୋଷାମୋଦିଆ ଅଇଁଠା ପତରରେ ଧ୍ୟାନ l

ଭାଷା ଆନ୍ଦୋଳନ ଜାତି ଗଠନର ପାଇଁ

ସ୍ୱାର୍ଥଛାଡ଼ି ଛାତିସଙ୍ଗେ ଛାତି ମିଳା ଭାଈ l

ବିଦେଶୀ ବର୍ଜନକରି ଦେଶୀ କର ଘେନା

ସ୍ୱାବଲମ୍ବୀ ପାଇଁ ନିଜେ ବସା କାରଖାନା l

ଉତ୍କଳେ ଜାଗିଲା ଡାକେ ନବ ଜାଗରଣ

ଉନ୍ମାଦେ ଉତ୍କଳ ବାସୀ ପୁଲକିତ ପ୍ରାଣ l

ଗୋପବନ୍ଧୁ,ରାଧାନାଥ,ଫକୀର ମୋହନ

ଗଙ୍ଗାଧର ଚଳାଇଲେ ଭାଷା ଆନ୍ଦୋଳନ l

ଉତ୍କଳ ସମ୍ମିଳନୀ ସେ ଜାତି ପ୍ରାଣ ସିନ୍ଧୁ

ସେଥିରେ ମିଶିଲାଆସି ଛାତି ରକ୍ତ ବିନ୍ଦୁ l

ଏହି ଥିଲେ କୁଳ ବୃଦ୍ଧ ବାରିଷ୍ଟର ମଧୁ

ତାଙ୍କବିନେ ନ ସରୁଛି ଦିନ କାନ୍ଦୁ କାନ୍ଦୁ l

ଶତାବ୍ଦୀର ସୂର୍ଯ୍ୟ ଜାତି ପ୍ରାଣର ସ୍ପନ୍ଦନ

କୋଟିଏ ବନ୍ଦନ ଆହେ ଶ୍ରୀ ମଧୁସୂଦନ l