ମାଟିଘର
ମାଟିଘର
ମୋ ଗାଁ ଦିଶଇ ସରଗୁ ସୁନ୍ଦର
ଧାଡିଧାଡି ମାଟିଘର
ନୂଆଁଣିଆ ଚାଳ ଉଚ୍ଚାନିଚ୍ଚା ପିଣ୍ଢା
ଝାଟିମାଟି ତାଟି ଘେର ।
ସବୁ ଘର ଚାଳେ ଘରଚଟିଆ ତ
ବସା ତାଙ୍କ ବାନ୍ଧିଥାନ୍ତି
ରାତି ପାହୁପାହୁ କିଚିରି ମିଚିରି
ମନ ଆମ ମୋହିଥାନ୍ତି ।
ଋତୁପରେ ଯେବେ ଆସେ ନୂଆ ଋତୁ
ମାଟିଘର ଲାଗେ ନୂଆ
ଅଜଣା ପୁଲକ ଅଜଣା ମହକ
ଦେଖାଏରେ ନୂଆ ରାହା ।
ସବୁ ମାଟିଘର ଛପର ହସଇ
ଆସେ ଯେବେ ବର୍ଷା ଋତୁ
ଚାଳ ମଥାନରେ ନିଇତି ଫୁଟଇ
ସୁଆଦିଆ ପାଳଛତୁ ।
ଦଶରା ଆସିଲେ ସବୁ ମାଟିଘର
ମାଟି କାନ୍ଥ ହସୁଥାଏ
ରଙ୍ଗବରଙ୍ଗର ଫୁଲ ଫୁଲକଢି
କାନ୍ଥ ସାରା ଅଙ୍କା ହୁଏ ।।
କାର୍ତ୍ତିକ ମାସରେ ଘର ଅଗଣାରେ
ଅପା ମୋ ମୁରୁଜ ପାରେ
ଧରମ ମାସରେ ମାଟିଘରେ ଆମ
ଭକତିର ମଧୁ ଝରେ ।
ମଗୁଶୁର ମାସେ ମାଟିକାନ୍ଥକୁ ତ
ଯତନରେ ଲିପେ ବୋଉ
ଚାଉଳ ଆଣରେ ଝୋଟିପାରିଦିଏ
ଦିଶୁଥାଏ ଦାଉଦାଉ ।
ପଉଷ ମାସରେ ଧାନ କଟାସରେ
ମାଟିଘର ଯାଏ ପୂରି
ଧାନ ଚାଉଳରେ ଅମାର ଆମର
ସବୁତକ ଯାଏ ଭରି ।
ବଇଶାଖ ମାସେ ଡହଡହ ତାତି
ସତେକି ବରଷେ ନିଆଁ
ମାଟିଘର ଆମ ଲାଗଇ ହେମାଳ
ସବୁରି ପରାଣ ଛୁଆଁ ।
ପକ୍କା କୋଠା ଠାରୁ ମାଟିଘର ଆମ
ନିଆରା ଆନନ୍ଦ ଦିଏ
ସବୁ ଋତୁରେ ସେ ନୂଆନୂଆ କଥା
କାନରେ ଆମର କହେ ।