ମାତୃଭାଷା

ଆମ ମାତୃଭାଷା ଓଡିଆ ବଢିଆ

ଆମ ମାଆ ପରି ସିଏ

ଏଡିକି ସରଳ ସୁରମ୍ୟ ତାହାକୁ

ସହଜରେ ବୁଝିହୁଏ ।

ମାଆ ମନ ପରି ସରଳ ତରଳ

ମାତୃଭାଷାଟି ଆମର

ଆମ ମନ କଥା ଅତି ସହଜରେ

କହେ ଲେଖେ କି ସୁନ୍ଦର ।

କେତେ ଆପଣାର ମାଆଟି ଆମର

ମାତୃଭାଷା ସେହିପରି

ଏତେ ଆପଣାର ଆଉ କେଉଁ ଭାଷା

ହେବ ତାହା ସମ ସରି ।

ଆମ ପିଲାଦିନୁ ଆମ ମାଆ ସିନା

ଶିଖାଇଲା ମାତୃଭାଷା

ଆମ ମାଆ ପରି ସହଜ ସୁନ୍ଦର

ସିନା ଆମ ମାତୃଭାଷା ।

ଆପଦେ ବିପଦେ ସବୁ ସମୟରେ

ମାଆ ଆମ ସିନା ସାହା

ମାତୃଭାଷା କେତେ ସୁନ୍ଦର ଭାବରେ

ଆମକୁ ଦେଖାଏ ରାହା ।

ଆମ ମାଆ ସମ ସାରା ଦୁନିଆରେ

କିଏ ଅଛି ଆଉ କହ

ମାତୃଭାଷା ଭଳି ଭାଷା ଆଉ ନାହିଁ

ଭଲ ଭାବେ କର ଲୟ ।

ଆମ ମନ କଥା ମାଆ ଜାଣିଥାଏ

ମନ ଲାଖି କହେ କଥା

ମନ ଲାଖି ସବୁ ଦରବ ଭୁଞ୍ଜାଏ

କଥାରେ ହରଇ ବ୍ୟଥା ।

ଆମ ମନ କଥା ଖୋଲି ଅନାୟାସେ

ମାତୃଭାଷାରେ କହିଲେ

ଆମରି ଭାଷାରେ କଥାଭାଷା ହୋଇ

ମାତୃଭାଷାରେ ଲେଖିଲେ।

ଗଉରବ ବଢିବ ମାତୃଭାଷାର

ରଖିବା ତାହାର ମାନ।

ମାତୃଭାଷା ଆମ ମାଆ ପରି ଆମେ

ରଖିବା ତାର ସମ୍ମାନ ।