ମାଆ ଶିଖରଚଣ୍ଡୀ

   

ମେଘ ଉଠାଇଛି କଳାହାଣ୍ଡିଆ l

ଶିଖରଚଣ୍ଡୀକୁ ଯାଆ ଚଣ୍ଡିଆ ll

ପର୍ବତ ଶିଖରେ ସିନ୍ଦୂର ମୁଣ୍ଡି l

ସବୁରି ବିପଦ ପାରନ୍ତି ଖଣ୍ଡି ll

କୋଣାର୍କେ ଅଟନ୍ତି ମାଆ ରାମଚଣ୍ଡୀ l

କଳାପାହାଡ଼କୁ ଥିଲେ ଯେ ଭଣ୍ଡି ll

କଟକେ ହାଟକେ କଟକ ଚଣ୍ଡୀ l

ବାରବାଟୀ ଦୁର୍ଗେ ସେ ଗଡ଼ଚଣ୍ଡୀ ll

ଖୁରୁଧା ଗଡ଼ରେ ସେ ବରୁଣାଇ l

ଚଣ୍ଡିକା ଚାମୁଣ୍ଡା କରୁଣାମୟୀ ll

ଚଣ୍ଡିଖୋଲ ଠାରେ ପାହାଡ଼ଚଣ୍ଡୀ l

ବ୍ରହ୍ମଗିରିରେ ବାଲି ହରଚଣ୍ଡୀ ll

ରାଜଧାନୀ ଉପକଣ୍ଠେ ଶିଖରୀ l

ଷଡ଼ଭୁଜା ମାଆ ଛନ୍ତି ପ୍ରହରୀ ll

ବନବାସ କାଳେ ପ୍ରଭୁ ଶ୍ରୀରାମେ l

ନିବାସ ରଚିଲେ ମାଆଙ୍କ ଧାମେ l

l

ତାଙ୍କ ସାନଭାଇ ବାବୁ ଲକ୍ଷ୍ମଣେ l

ପୂଜାକଲେ ଆଙ୍କି ତୀରର ମୁନେ ll

କାଳଗର୍ଭେ ଗଲା ସେ ମୂର୍ତ୍ତି ହଜି l

ମୁକୁନ୍ଦ ପୂଜିଲେ ତାହାଙ୍କୁ ଖୋଜି ll

ମନ୍ଦିର ଦକ୍ଷିଣେ ଗୁମ୍ଫା ପାଣ୍ଡରା l

ପାଣ୍ଡବେ କରିଲେ ନିବାସ ପରା ll

ଏକ କାଳେ ପଟିଆର ରାଜନ l

ମାଆ ତୋର ଥିଲେ ଭକ୍ତପ୍ରଧାନ ll

ତୋ ନିବାସ ଥିଲା ଅରଣ୍ୟ ପୂର୍ଣ୍ଣ l

ଶୁଭୁ ଥିଲା ବାଘ ଭାଲୁ ଗର୍ଜନ ll

ଏବେ ହୋଇଛି ଅତି ରମଣୀୟ l

ବଣଭୋଜି ସାଥେ ସେ ଦର୍ଶନୀୟ ll

ଧନ୍ୟ ରାଜଧାନୀ ଭୁବନେଶ୍ୱର l

କୋଳେ ଧରିଅଛୁ ମାଆକୁ ମୋର ll

ଦୟିନୀ ତୋ ପଦେ ଶିଖରଚଣ୍ଡୀ l

ଦୟା ରଖିଥିବୁ ଦୋଷୀଙ୍କୁ ଦଣ୍ଡି ll