ଲାଲ ଟହଟହ ପାତଲଘଣ୍ଟା
ଲାଲ ଟହଟହ ପାତଲଘଣ୍ଟା
ଲାଲ ଟହଟହ ପାତଲ ଘଣ୍ଟା
ତୁହି ନାମ ଟମାଟର l
ପାତାଳ ପୁରେ ପାଇଲି ମୁହିଁ
ଖବର ଜୋରଦାର ll
ବିଲାତୁ କିବା ଆସିଲୁ ଅବା
ବିଲାତି ତୋର ପଣ l
ଲୋକ କହନ୍ତି ଶ୍ରଦ୍ଧାରେ ଅତି
ବିଲାତି ବାଇଗଣ ll
ପରିବା ଅବା ଫଳଟେ ତୁହି
ନପାରେ ମୁହିଁ ଜାଣି l
ଚଟଣି ଥରେ ଖୁଆଇ ଥିଲେ
ଆମର ସମୁଦୁଣି ll
ଜ୍ୱରେ ଦୁର୍ବଳ ଥଣ୍ଡା ପ୍ରବଳ
ପେଟର ଗୋଳମାଳ l
ଅଧା ଘଣ୍ଟାରେ ଉଠି ବସିଲି
ପିଇ ପାତଲ ଝୋଳ ll
ଧନ୍ୟରେ ଧନ୍ୟ ତୋର ଜୀବନ
ପଡ଼ିଲେ ଚେନେ କାହିଁ l
ସୁଆଦ ପଣେ ନିଆରା ଭଣେ
ଦ୍ଵିଗୁଣ ଯାଏ ହୋଇ ll
ଟମାଟୋ ରସ ଟମାଟୋ ସସ
ଟମାଟୋ ଚଡ଼ଚଡ଼ି l
ମୁସୁ ମୁସିଆ ଖସ ଖସିଆ
ସାଙ୍ଗରେ ବିରିବଡ଼ି ll
ଜୀବ ବିଜ୍ଞାନୀ ତୋ ଗୁଣ ଗୁଣି
କହିଲେ ଡାକ୍ତର l
ତୋ ଦେହେ ଅଛି ଜୀବନ ତତ୍ତ୍ୱ
କଣିକା ଭରପୁର ll
ଏତେ ଖବର ଜାଣି ଜବର ମନ
ମୋ ଗଲା ଭୁଲି l
କଥାଟେ ମୁହିଁ ପଚାରେ ଭାଇ
କହିବୁ ଟିକେ ଖାଲି ll
ଅଦର ଦର ଭାଉଟା ତୋ'ର
ଛକୋଡ଼ି କିଆଁ ହେଲା l
ବେପାରୀ ରାଜା ମାଇଲେ ମଜା
ଚାଷୀ ଭାଇଟି ମଲା ll
ବେପାରୀ କହି ଲାଭ ମୋ ନାହିଁ
ବିକେ ମୁଁ ଯାହା କିଣା l
ଫାଇଦା ମୋର ଏକ ଦଣ୍ଡିରେ
ମାତର ଆଠ ଅଣା ll
ହଉରେ ହଉ ପାତଲ ଘଣ୍ଟା
ଲଗାଇ ଥାଆ ନାଟ l
ତୋ' ପାଇଁ ଭାଇ ଯିବିନି ମୁହିଁ
ଆଉ ଏଣିକି ହାଟ ll