କଠୋର ସତ୍ୟ

ଯୁବା ବୟସରେ ଅୟସ ପାଇଁ ମୋ ପାଖରେ ନଥିଲା ଧନ,

ପର ଦରବକୁ ଦେଖି କିଣିବାକୁ ଛଟପଟ ହୁଏ ମନ |

ମାଛ ମାଂସ ମିଠା ଆଉ କେତେ ଚିଜ ଖାଇବାକୁ ମନ କହେ,

ଭଲ ଜାମାପଟା ଦାମୀ ଯୋତା ପାଇଁ ମୋ ମନ ବିକଳ ହୁଏ |

ନୂଆ ସାଇକେଲ ଖଣ୍ଡେ ମିଳିଲାନି ଭଙ୍ଗାକୁ ସଜାଡ଼ି ରଖେ,

ଭଙ୍ଗାଘରଟିକୁ ମରାମତି ପାଇଁ ବୋଉ ମୋତେ ଚିଠି ଲେଖେ |

ବାହାଘର ପରେ ଘରଣୀ ମାଗିଲା ନାକ ଫୁଟୁକି ତା' ପାଇଁ,

ନିଅଣ୍ଟ ବଜେଟ ଅଳପ ଦରମା ମୁଁ କିଣି ପାରିଲି ନାହିଁ |

ବୟସ ବଢ଼ିଲା ଦରମା ବଢ଼ିଲା ଖରଚ ବି ବଢ଼ି ଚାଲେ,

ଚାହୁଁ ଚାହୁଁ ମୋର ଚାକିରୀ ସରିଲା ବଡ଼ ହେଇଗଲେ ପିଲେ |

ଅବସର ପରେ ପେନସନ ମିଳେ ପିଲାଏ ଆଣିଲେ ଧନ,

ଖାଇବା ପିନ୍ଧିବା ଗାଡ଼ିରେ ଚଢ଼ିବା ସଉକରେ ନାହିଁ ମନ |

ମାଂସ ମିଠା ତେଲ ପିଠା ଖାଇବାକୁ ଡାକ୍ତର କରିଲେ ମନା,

ଗାଡି ଚଲେଇବା ସାହସ ତ ନାହିଁ କି ହେବ ଦାମିକା କନା ?

ରହିବାକୁ ଲୋକ ନାହାନ୍ତି ପାଖରେ ତୋଳିଛି ମୁଁ ବଡ଼ ଘର,

ଗହଣା ଦେଇଛି ଘରଣୀ ପିନ୍ଧୁନି ମାତିଛନ୍ତି ସୁନାଚର |

ପୁଅ ଯାଚି ଦେଲା ଦାମୀ ମୋବାଇଲି ଚଳେଇ ଆସୁନି ମୋତେ,

ଲାଜ ମାଡ଼େ ଏବେ କୋଟ ବୁଟ ପିନ୍ଧିବାକୁ ଅଛି ଯେତେ |