କରୋନା

କରୋନା କବଳେ କବଳିତ ବିଶ୍ୱ

ଚତୁର୍ଦ୍ଦିଗେ ହାହାକାର

ରଚୁଛି ଧରାରେ ମୃତ୍ୟୁର ତାଣ୍ଡବ

ସ୍ଥିତି ଭାରି ଭୟଙ୍କର ।

ମାନବ ସମାଜ ଆତଙ୍କିତ ହୋଇ

ସାଜୁଅଛି ଗୃହବନ୍ଦୀ

ବିଜ୍ଞାନ କୌଶଳ ପ୍ରୟୋଗ ନିମିତ୍ତ

ଖଟାଉଛି ନିଜ ବୁଦ୍ଧି ।

ସଂସାରେ ମଣିଷ ଜନମ ତ ଶ୍ରେଷ୍ଠ

ଈଶ୍ୱର ହିଁ ସର୍ବ ସ୍ରଷ୍ଟା

ରୋଗ ଶୋକ ଠାରୁ ମୁକତିର ପଥ

ସଦା ଚାଲୁଅଛି ଚେଷ୍ଟା ।

କରୋନାର ଦାଉ ଭାଙ୍ଗି ଦେଉଅଛି

ମନ ତଳ ସାହସକୁ

କିଏ ବା କେମିତି ସହିବ ଏ ଦୁଃଖ

ହରାଇ ଯେ ଆତ୍ମୀୟଙ୍କୁ ।

ତଥାପି ଆଶାର ଆଲୋକ ଟିକିଏ

ଜଳୁଅଛି ହୃଦ ତଳେ

କରୋନାର ମୂଳ ଉତ୍ପାଟନ ହେବ

ଆମରି ଉଦ୍ୟମ ବଳେ ।

ଟିକେ ସାବଧାନ ପାଳିବା ନିୟମ

ମାସ୍କ ପିନ୍ଧିବା ନିତି

ଦୂରତା ରଖିବା ସଜାଗ ହୋଇବା

ବିପଦରୁ ଯିବା ବର୍ତ୍ତି ।

ନାଶ ହେବ ନିଶ୍ଚେ ଏହି ମହାମାରୀ

ହସିବ ପୁନଶ୍ଚ ମହୀ

ନୂତନ ସକାଳ ନବ ବାର୍ତ୍ତା ଦେବ

ଭୟଭୀତ ହୁଅ ନାହିଁ ।