କରିବା ବୃକ୍ଷ ରୋପଣ
କରିବା ବୃକ୍ଷ ରୋପଣ
ବିଜ୍ଞାନ ଯୁଗର ବିଜ୍ଞାନୀ ମାନବ ,
ଗାଆଁ ଠୁଁ ହୋଇଲ ଦୂର
ସହରେ ତୋଳିଲ ଘର ।
ନାନା ରୂପେ ନିତି ତାଡୁଛ ପ୍ରକୃତି
ଭୁଲି ତା'ର ଉପକାର
ପ୍ରକୃତିକୁ କଲ ପର ॥
ଦେଖିଲ ତ ଆଜି ପ୍ରକୃତି ସମୀପେ
କେତେ ତୁଚ୍ଛ ତୁମ ଶକ୍ତି
ରହିଲାନି କରାମତି ।
ପ୍ରକୃତି ରଚିଲା କି ମହା ତାଣ୍ଡବ
ଉଗ୍ର ରୂପେ ଦେଇ ଭୀତି
କରିଲା ନାନାଦି କ୍ଷତି ॥
ମହାବାତ୍ୟା ପରେ ଚେତା ପଶିଲାନି
ଖେଳିଲ ପ୍ରକୃତି ସହ
କେତେ ଭାଵେ ଅହରହ ।
ଫୋନି ଫଣା ଟେକି କଲା ସର୍ବଗ୍ରାସ
ଜିଭ କରି ଲହ ଲହ
ନ ରଖି କିଛିର ମୋହ ॥
ପ୍ରକୃତିର ସାଥେ ଖେଳିବାର ଫଳ
ଆଣିଦେଲା ସର୍ବନାଶ
ଦେଖିଲ ପ୍ରକୃତି ରୋଷ ।
ନିଜ କଲା କର୍ମ ଫଳ ତ ଭୋଗୁଛ
ପ୍ରଳୟ କି କାହା ବଶ
ଦେବା ଆଉ କାହା ଦୋଷ ॥
ଧ୍ଵଂସହେବା ଆଗୁ ଏ ସୁନ୍ଦର ଧାରା
ବେଳୁ ହୁଅ ସାବଧାନ
ପ୍ରକୃତିକୁ ଦିଅ ଧ୍ୟାନ ।
ସବୁଜ ସୁନ୍ଦର କର ପରିବେଶ
ସର୍ବେ ହେଇ ସଚେତନ
କରିବା ବୃକ୍ଷ ରୋପଣ ॥