କପଟି କାଳିଆ
କପଟି କାଳିଆ
ଶ୍ରୀକ୍ଷେତ୍ରରେ ଏବେ ଚହଳ ପଡ଼ିଛି
ପ୍ରଭୁ ନୀଳାଦ୍ରି କେଶରୀ l
ପଠାଇ ଦେଇଛି କୁଟ କପଟିଆ
ଲକ୍ଷ୍ମୀଙ୍କୁ ବରୁଣ ପୁରୀ ll
ଆନନ୍ଦରେ ଲକ୍ଷ୍ମୀ ଯାଇଛନ୍ତି ଚାଲି
ଘେନି ଦାସୀ ପରିବାରି l
ଆଜ୍ଞା ଦେଲେ ବଡ଼ ଠାକୁର ସୁଭଦ୍ରା
ହସୁଥାନ୍ତି କିରି କିରି ll
ବଡ଼ ଖିଆ ପ୍ରଭୁ ଖାଇବେ ଏଥର
ମାଆ ହାତ ରନ୍ଧା ଭାତ l
କେତେ ଖିରିପୁରି ପିଠା ତରକାରୀ
ସର ଲବଣୀ ନବାତ ll
ଗୋପପୁରୁ ଆସି ପହଞ୍ଚି ଗଲେଣି
ଦ୍ୱାପର ଯଶୋଦା ମାଆ l
ଉଠାଇ ଭୁଞ୍ଜାନ୍ତି ପ୍ରଭୁ ଚକ୍ରପାଣି
କୁଆ ନ ରାବୁଣୁ କାଆ ll
ପ୍ରଭାତରୁ ଡାକ ଉଠ ବାବୁ ଆରେ
ଦୁଃଖୀଧନ ନୀଳମଣି l
ମୂଖ ଧୁଅ ବାବୁ ସଜାଇ ରଖିଛି
ଚନ୍ଦନ ଚୁଆର ପାଣି ll
ଦୁଆରେ ଡାକନ୍ତି ଶ୍ରୀଦାମ ସୁବଳ
ଉଠ ଉଠ ବେଗ କରି l
ଗୋଟିକା ଅଧାମ ଭୁଞ୍ଜାଇ ଦେବି ମୁଁ
ଚରାଇ ଯିବ ବାଛୁରୀ ll
ବାତ୍ସଲ୍ୟର ଲୀଳା କରନ୍ତି ଠାକୁରେ
ପ୍ରଭୁ ଜଗତର ନାହା l
ପୁଅର ପେଟକୁ ଚିହ୍ନି ଥାଏ ସିନା
ସ୍ନେହମୟୀ ସେହି ମାଆ ll
ସରିଯାଏ ଦିନେ ବାଲ୍ୟ ଲୀଳା ଖେଳା
କଥା ରହିଥାଏ ମନେ l
ଦ୍ୱାପରରେ ସ୍ନେହ ଡୋରେ ବାନ୍ଧିଥିଲେ
ଯଶୋମତୀ ଶ୍ୟାମଘନେ ll
ମକର ସଂକ୍ରାନ୍ତି ପାଖେଇ ଆସୁଛି
ମଜା ମାରି ଖଜା ଖାଅ l
ହରି ଛଡ଼ାଇବେ ଫେରି ଆସି ମାଆ
ରୁହ ହେ ଗଉଡ଼ ପୁଅ ll
ଦୁଇପଦ କଥା ଲେଖିଲି ଠାକୁରେ
ଅପୂର୍ଵ ଲୀଳାକୁ ଭାଳି l
ରୋଷ ନ କରିବୁ ଗୋବର୍ଦ୍ଧନ ଟେକା
ଜଗବନ୍ଧୁ ବନମାଳୀ ll