Library
କନ୍ୟା ଭ୍ରୁଣର ଆର୍ତ୍ତନାଦ
କନ୍ୟା ଭ୍ରୁଣର ଆର୍ତ୍ତନାଦ
ରହି ରହି ଶୁଭେ ଆର୍ତ୍ତ ଚିତ୍କାର
ଅମା ଅନ୍ଧକାର ଚିରି
କନ୍ୟା ଭ୍ରୁଣର ଆକୁଳ କ୍ରନ୍ଦନେ
ହୃଦୟ ଉଠୁଛି ଥରି |
ମାଆ ବୋଲି ମୋତେ ଡାକିବାକୁ ଥରେ
ସୁଯୋଗ ଦିଅହେ ଆଣି
ଦୁନିଆ ଆଲୋକ ଦେଖିବା ଆଗରୁ
କିପାଇଁ ଦେଉଛ ହାଣି |
ମୁଁ ଏକ ନିରୀହ ନିଷ୍ପାପ ଭ୍ରୁଣ
ମାଟିରେ ପାଦମୋ ଥାପି ନାହିଁ
କେଉଁ ଅପରାଧେ କରୁଅଛ ହତ୍ୟା
ଅବୋଧ ମନମୋ ବୁଝୁନାହିଁ |
କନ୍ୟା ଭ୍ରୁଣ ବୋଲି ଘୃଣା କି କରୁଛ
ତୁମେବିତ ଜଣେ ନାରୀ
ଯେଉଁ ନାରୀ ବିନା ସଂସାର ଅଧୁରା
ପାରୁନା କି ତୁମେ ଜାଣି |
ସଂସାର ସାଗରୁ ମଙ୍ଗ ସଳଖିଯେ
ସୁଅରୁ କରଇ ପାରି
ମଙ୍ଗଳମୟୀ ଜନନୀ,ଭଗିନୀ,
ଜାୟା ଅଟେ ସେହି ନାରୀ |
ଗର୍ଭରେ ତୁମ ଶୋଇ ରହି ମାଆ
ସପନ କେତେମୁଁ ଦେଖୁଅଛି
ତୁମ ପରି ଏକ ମାଆଟିଏ ହେଇ
ସଂସାର କେତେ ମୁଁ ପାଳୁଅଛି |
ଝିଅ ଜନ୍ମ ନୁହେଁ ଅଭିଶାପ କେବେ
ପରମେଶ୍ୱରଙ୍କ ଆଶୀର୍ବାଦ
ନାରୀ ବିନା କେହି ଗଢ଼ିନି ସଂସାର
ତା' ବିନା କିଏବା ଅଭିଶପ୍ତ |
କନ୍ୟା ଭ୍ରୁଣଟିଏ କରୁଛି ଅଳି ମୁଁ
ବଞ୍ଚିବାକୁ ଟିକେ ରାହା ଦିଅ
ଦୁନିଆ ଆଲୋକ ଦେଖିବାକୁ ମାଆ
ଥରଟିଏ ମୋତେ ସାହା ହୁଅ |
ଭଲ କାମ କରି ଖ୍ୟାତି ମୁଁ ଅର୍ଜିବି
ତୁମ ଯଶ ବାନା ଉଡାଇବି
ପୁରୁଷ ପ୍ରବଣ ସମାଜରେ ନିଶ୍ଚେ
ଝିଅଙ୍କ ଆଦର ବଢାଇବି |
ମନ ଦେଇ ଟିକେ ଶୁଣ ମୋ ଜନନୀ
କନ୍ୟା ଭ୍ରୁଣ ହତ୍ୟା କରିବନି
କନ୍ୟା ଭ୍ରୁଣ କଥା କହୁଛି ବଖାଣି
ମୋ କଥା କୁ ମିଛ ମଣିବନି |
ଆମ ଝିଅ ପରା 'ଶ୍ରଦ୍ଧାଞ୍ଜଳି 'ଏଠି
ଫୁଟବଲ ରାଣୀ ପାଲଟିଛି
'ଜ୍ୟୋତି ସୁନିତା 'ଙ୍କ ହକି ର କାହାଣୀ
ବିଜୟର ଗାଥା ଗଉଅଛି |
'ରାନୁ ମହାନ୍ତି ' ଙ୍କ ଭାର ଉତ୍ତୋଳନ
'ପ୍ରଭାସିନୀ' ଙ୍କ ର ନୌକା ଚାଳନ
'ପଦ୍ମିନୀ 'ବିଶ୍ୱରେ ପଦ୍ମ ଫୁଟାଇ
ଚେସ ର କଥା କହୁଅଛି |
'କଳ୍ପନା ମହାନ୍ତି 'ଏଭରେଷ୍ଟ ଚଢି
କାଳିଆର ବାନା ରୋପି ଛନ୍ତି
'କିରଣ ବେଦୀ 'ତ ସବୁଠୁ ଆଗରେ
ଜାତିସଂଘେ କୀର୍ତ୍ତି ରଚିଛନ୍ତି |
କେତେ କନ୍ୟା ରତ୍ନ ଗୁଣ ମା' ଗାଇବି
ସମୟ କରୁଛି ପ୍ରତିବାଦ
ପ୍ରତିଭା ପାଟିଲ ସର୍ବ ଶ୍ରେଷ୍ଠ ନାରୀ
ଈଶ୍ୱରଙ୍କ ସିଏ ଆଶୀର୍ବାଦ |
ଭ୍ରୁଣ କାଳୁ ମୋତେ କର ନାହିଁ ହତ୍ୟା
କରିବି ମୁଁ ତୁମ ଜୟ ଗାନ
କନ୍ୟା ରତ୍ନ ଙ୍କର ପ୍ରତିଭା ପରଶେ
ମାଆ ମାଟି ହେବ ମହୀୟାନ |
କନ୍ୟା ଭ୍ରୁଣ ହତ୍ୟା ମହାବାତ୍ୟା ଭଳି
ସୃଷ୍ଟି କୁ କରିବ ଭୂଲୁଣ୍ଠିତ
ବେଳହୁଁ ସତର୍କ ହୁଅରେ ମଣିଷ
ନହେଲେ ହୋଇବ ଅଭିଶପ୍ତ |
ହେ ମାନବ ସମାଜ
ଶିଶୁ କନ୍ୟା ଜନ୍ମ ଦେଇ
ସବୁଜ ସଂକେତ ନେଇ
ଚାଲରେ ଆଗକୁ ଆଗକୁ
ଯେଉଁଠି ଥିବ ଦୁଇ ହାତ ମାତ୍ର
ପହଂଚି ବାକୁ ସରଗ ପୁରକୁ ।
