କଳାଠାକୁର
କଳାଠାକୁର
କଳାଠାକୁର ମୋ କଳାଠାକୁର
ଗର୍ବ ଗଉରବ ତୁମେ ଆମର ।
ସାରା ଜଗତର ସରଜନା କଲ
ଇଚ୍ଛାରେ ଧରିଲ ଦାରୁ ଶରୀର ॥୦॥
କଳପ ବଟର ମୂଳେ ବସିଛ
ଭାଇ ଭଉଣୀଙ୍କ ସଙ୍ଗେ ହସୁଛ ।
ସୁଦରଶନଙ୍କୁ ରଖିଛ ପାଶରେ
ପତିତପାବନ ନାମ ତୁମର ।୧।
ତୁଳସୀ ଦୟଣା ଲାଗି ହୋଇଛ
ଧଣ୍ଡାମାଳମାନ ହୃଦେ ବହିଛ ।
କର୍ପୂର ଚନ୍ଦନ ବାସ ଚହଟାଇ
ଭକତଙ୍କ ଦୁଃଖ କରୁଛ ଦୂର ।୨।
ଷାଠିଏ ପଉଟି ଭୋଗ ଖାଉଛ
ସେ ଭୋଗ ଭକତଙ୍କୁ ଖୁଆଉଛ ।
ପତିତପାବନ ବାନା ଉଡାଉଛ
ପତିତ ତାରଣ ନାମ ତୁମର ।୩।
ତ୍ରିପଣ୍ଡ କାଳିଆ ରୂପ ଧରିଛ
ଚନ୍ଦ୍ର ସୂର୍ଯ୍ୟ ନେତ୍ର ତୁମେ ବହିଛ ।
ଦେଖି ଚକା ଆଖି ଆଖି ଯାଏ ଲାଖି
ଆଖିରେ ତୁମର ଅଛି ହୁନ୍ଦର ।୪।
ବାର ମାସେ ତେର ଯାତ କରୁଛ
ଜଗତ ଜନଙ୍କ ମନ ମୋହୁଛ ।
ଷୋଳକଳା ଧରି ମାନବ ଲୀଳାରେ
ଲୀଳାରତ ତୁମେ ଜଗଦୀଶ୍ୱର ।୫।
ମନ ତ ତୁମେ ହରାଇ ବସିଛ
ଗୋପାଙ୍ଗନାଙ୍କୁ ତ ମନ ଦେଇଛ ।
କିସ ଅବା ଊଣା ରହିଛି ତୁମର
ମୋ ମନକୁ ନିଅ ପରମେଶ୍ବର ।୬।
କିଛି ମାଗୁନାହିଁ କହୁନି ମିଛ
ଦାରୁଭୂତ ହୋଇ କିଆଁ ବସିଛ ?
ତୁମ ଶ୍ରୀପୟରେ ଚିତ୍ତ ଯେ ଲଗାଏ
ଭବସାଗରରୁ କରୁଛ ପାର ।୭।
ସଂସାରର ପାପ ତାପ ହରୁଛ
ଭକତ ବାନ୍ଧବ ନାମ ବହିଛ ।
ଭକତ ତୁମର ତୁମେ ଭକତର
ତୁମ ନାମ ମୋର ଗଳାର ହାର ।୮।