କଳାମାଣିକ

  

    ଖେଳିବୁ ଦୋଳି ଧନରେ ମୋର

        ଖେଳିଲେ ବଢେ ବଳ

    ହେଇ ଚାଲିଯା' ଉପରକୁ ତୁ

         ଚାଲିଆ' ପୁଣି ତଳ ।। 

    ତୋ ପାଶେ ଅଛି ମାଆ ମୁଁ ତୋର

        ଗୀତଟେ ଦେବି ଗାଇ

    ଖୁଆଇ ଦେବି ଆହାର ତୋର

        ଖୁସିରେ ଦେବୁ ଖାଇ ।। 

    କାଖେ ବସେଇ ନେବି ବୁଲେଇ

        ଦେବିରେ ଫୁଲ ତୋଳି

    ଖୁସିରେ ଆଗ ଖାଇଦେ' ଧନ

        ଝୁଲିଝୁଲିକା ଦୋଳି ।। 

    ଝୁଉଲୁ ହାତୀ ଝୁଲଣ ହାତୀ

        ବୁଲୁଥା' ଯାଇ ବନେ

    ବଳୁଆ ତୁହି ତୋ କଥା ସବୁ

        ଧନ ରଖିଛି ମନେ ।। 

    ଖାଇଲେ ଆଉ ଖେଳିଲେ ସିନା

        ଦେହରେ ବଢେ ବଳ

    ଉଡିଯା' ଦୋଳି ଯା' ଉଡିଯା'

        ଆ' ଖସି ଆ' ତଳ ।। 

    ବାପା ତୋହର ଭାରି ବଳୁଆ

        କୋକ ପଳାଏ ଡରି

    ବଡ ହେଲେ ତୁ ହେବୁ ସେପରି

        ଖାଇବୁ ସବୁ ଧରି ।। 

    କାଳୀ ଗାଈଟା ଦେଇଛି କ୍ଷୀର

        ପିଇବୁ ଦେବି ଆଣି

    ସର ଲବଣୀ ରଖିଛି ଦେବି

        ତୋହରି ମନ ଜାଣି ।। 

    ଖାଇବୁ ଆଉ ଖେଳିବୁ ଧନ

        ଦୋଳିରେ ବସି ବସି

    କଳାମାଣିକ ମାଆ ମୁଁ ତୋର

        ଦେ' ତୁ ଟିକେ ହସି ।।