କଳାକାର ସ୍ମରଣେ

ରଙ୍ଗଛଡା ଏକ ଇନ୍ଦ୍ରଧନୁଷରୁ

ଅବଶିଷ୍ଟ ରଙ୍ଗ ଧୋଇ

କିଏ କଳାକାର ଆଙ୍କିଛି ଏ କୃତି

ନିଜେ ପାଉଁଶିଆ ହୋଇ ?

ଇତିହାସ ସିନା କଡ଼ ଲେଉଟାଇ

ଢାଙ୍କିଦେଲା ଅନ୍ଧକାର

ପିଠିକରି ସେହି ଅନ୍ଧାରକୁ ଦିନେ

ଥିଲା ସିଏ ନିର୍ବିକାର ।

କ୍ଳାନ୍ତ ଜୀବନର ଅପରାହ୍ନେ ନିଜ

ଭାବନା ସାଗରେ ଦ୍ରବି

ବାର୍ଦ୍ଧକ୍ୟ ବେଳାରେ ଭରିଛି ନିଖୁଣ

ଯୌବନର ପ୍ରତିଛବି ।

ନିଜକୁ ସମ୍ଭାଳି ନେବା ମନୋବଳ

ସାଧନାରେ ରଖି ଲୟ

ଛାତି ଚିରୁଥିବା କାଠହଣାକୁ ସେ

ମାଗିନାହିଁ ପରିଚୟ ।

ତା' ମନ ଓହଳେ ବସା ବାନ୍ଧିଥିଲା

ହଳଦୀବସନ୍ତ ସିନା

ଘରଚଟିଆର ଆଶ୍ବାସନା ନେଇ

ସର୍ଜିଛି ବିରାମ ବିନା ।

ବୁକୁରୁ ତାହାର ଖସି ଯାଇଥିବ

ତୁହା ତୁହା ଦୀର୍ଘଶ୍ବାସ

ପରାହତ ହୋଇ ତଥାପି ନିଜକୁ

କରିନାହିଁ ଅବିଶ୍ୱାସ ।

ପରଳ ତଳର ଧର୍ମପଦ ଆଖି

ରଖି ଆତ୍ମନିୟନ୍ତ୍ରଣ

ଦସ୍ତଖତ ପାଇଁ ସାଗରକୁ କାହିଁ

ଦେଇନି ତ ନିମନ୍ତ୍ରଣ !!

ପ୍ରସନ୍ନ କୁମାର ମାଦଳା