କଳା କାହ୍ନୁ ଆସୁଛି
କଳା କାହ୍ନୁ ଆସୁଛି
ଘଣ୍ଟୁଆ ବଜାରେ ବଜା ଘଣ୍ଟକୁ ବଜା
ଟିକେ ଭାବ ଭକତିରେ ବଜା
ହରିବୋଲ ହୁଳହୁଳି ପଡୁଛି
ଦେଖ ଝୁଲି ଝୁଲି କଳା କାହ୍ନୁ ଆସୁଛି
ମୋ କଳା ଠାକୁର ଦେଖ ରଥେ ଆସୁଛି ...( ୧ )
ରଥେ ଶ୍ରୀସୁଦର୍ଶନ କାଳିଆ ବଳିଆ
ପୁଣି ବିଜେ ଭଉଣୀ ସୁଭଦ୍ରା
ରଥରୁ ହୋ ଭକତେ ହୋ ଶୁଭୁଛି
ଦେଖ ଝୁଲି ଝୁଲି କଳା କାହ୍ନୁ ଆସୁଛି
ମୋ କଳା ଠାକୁର ଦେଖ ରଥେ ଆସୁଛି ...( ୨ )
ଘର୍ଘର ନାଦରେ ପଥେ ରଥ ଗଡୁଛି
ଶରଧା ବାଲି ହସି ଉଠୁଛି
ପୁରୀ ଜନ ସମୁଦର ହୋଇଛି
ଦେଖ ଝୁଲି ଝୁଲି କଳା କାହ୍ନୁ ଆସୁଛି
ମୋ କଳା ଠାକୁର ଦେଖ ରଥେ ଆସୁଛି ... ( ୩ )
ମାଉସୀ ମାଆ ଜଗାକୁ ଚାହିଁ ରହିଛି
ଶ୍ରଦ୍ଧାରେ ପୋଡ଼ ପିଠା କରିଛି
କାଳିଆ ବଳିଆ ଧାଇଁ ଆସିଛି
ଦେଖ ଝୁଲି ଝୁଲି କଳା କାହ୍ନୁ ଆସୁଛି
ମୋ କଳା ଠାକୁର ଦେଖ ରଥେ ଆସୁଛି ...( ୪ )
ପତିତ ଉଦ୍ଧାର ପାଇଁ ଲୀଳା ଚାଲିଛି
ରଥରୁ ହାତ ଠାରି ଡାକୁଛି
ଭେଦ ଭାବ ସବୁ ଦୂର ହୋଇଛି
ଦେଖ ଝୁଲି ଝୁଲି କଳା କାହ୍ନୁ ଆସୁଛି
ମୋ କଳା ଠାକୁର ଦେଖ ରଥେ ଆସୁଛି ...( ୫ )
ବଡ଼ ଦାଣ୍ଡରେ ଝୁଲି ଝୁଲି କିଏ ଆସୁଛି
ଆନନ୍ଦେ ଅଶ୍ରୁ ଝରି ପଡୁଛି
ଆପେ ଆପେ ହାତ ଉଠି ଯାଉଛି
ଦେଖ ଝୁଲି ଝୁଲି କଳା କାହ୍ନୁ ଆସୁଛି
ମୋ କଳା ଠାକୁର ଦେଖ ରଥେ ଆସୁଛି ... ( ୬ )