କେଡ଼େ କର୍ମ କଲି

ନୀଳାଚଳେ ମହାପ୍ରଭୁ ଶ୍ରୀକ୍ଷେତ୍ର ମଉଳି l

ଛପନଭୋଗୀ ତାଙ୍କର ବଢ଼ ଭୋଗଥାଳି ll

ଭକତ ନିମନ୍ତେ ମେଲା ତା ସିଂହ ଦୁଆର l

ଖୋଲା ଭକତ ନିମନ୍ତେ ଆନନ୍ଦ ବଜାର ll

ବଡ଼ଖିଆ ବୋଲି ତାର ଯୁଗେଯୁଗେ କୀର୍ତ୍ତି l

ମାଗିଖାଏ ଭକ୍ତ ହାତୁ ଥିଲେ ତାରେ ଭକ୍ତି ll

ଦ୍ଵାପରେ ଭକ୍ତ ବିଦୁର ଘରେ ଶାଗ ଭାତ l

ମାଗି ଖାଇ ଥିଲେ ପରା ପ୍ରଭୁ ଜଗନ୍ନାଥ ll

ଦହି ଦୁଧ ଚୋରାଇ ସେ କାଳିଆ କହ୍ନାଇ l

ବ୍ରଜେ ପ୍ରସିଦ୍ଧ ହୋଇଛି ଦୁଗ୍ଧଚୌର ଭାଇ ll

ଭକ୍ତ ଭାବ ବିନୋଦିଆ ପ୍ରଭୁ ଭାବଗ୍ରାହୀ l

ଅଭୁକ୍ତ ରହିଲେ ଭକ୍ତ କାନ୍ଦନ୍ତି ଲୁଚେଇ ll

ଲୀଳା ମୟ ଜଗନ୍ନାଥ ବ୍ରହ୍ମାଣ୍ଡ ଠାକୁର l

ଲକ୍ଷ୍ମୀ ଭୁଞ୍ଜାନ୍ତି ବ୍ୟଞ୍ଜନ ନାନା ପରକାର ll

ବୈଷ୍ଣବ ଅଗ୍ନିରେ ପାକେ ସୁନା ଚଟୁ ଧରି l

ରୋଷଚୁଲିରେ ରାନ୍ଧନ୍ତି ମାଆ ଶାକମ୍ବରୀ ll

ହାୟରେ ମାନବ ମୁହିଁ କେଡ଼େ କର୍ମ କଲି l

ଶେଷରେ ଭାଙ୍ଗିଲି ମୁହିଁ ତା ବୈଷ୍ଣବଚୁଲି ll

ଇନ୍ଦୁ ମୁଖେ ତାର ମୁହିଁ ବୋଳିଲି କଳଙ୍କ l

ପାପ ପଙ୍କ ପ୍ରବଳ ମୋ ମୁହିଁ ମହା ମୂର୍ଖ ll

ମାନବ ହୋଇ ମୁଁ କଲି ଦାନବ କରମ l

କ୍ଷମାମୟଙ୍କୁ ଗୁହାରୀ ପାପ ମୋର କ୍ଷମ ll