କେମିତି ପଢିବ ଗରିବ ପିଲା ?

ଅନ୍ ଲାଇନିରେ ଶିକ୍ଷାଦାନ ନିଶ୍ଚେ,

ପାଠପଢ଼ା ପାଇଁ ବହୁତ ଭଲ ।

ଧନୀ ପିଲା ପଢେ ଖୁସିରେ ଖୁସିରେ,

ଗରିବ ପାଇଁ ଏ ନିହାତି ଭେଲ ।।

ଧନୀ ପିଲାଟିର ଦାମି ମୋବାଇଲ୍,

ଲାପ୍ ଟପ୍ ପୁଣି ଥାଏ ଯେ ଘରେ ।

ଗରିବ ପିଲାର ନଥାଏ ଏ ସବୁ,

ରହିଥାଏ ସିଏ ଭୋକ ଶୋଷରେ ।।

ଭୋକ ମାରିବାକୁ ଯା' ପାଶେ ନଥାଏ,

ଦୁଇ ଓଳା ପାଇଁ ହାଣ୍ଡିରେ ଦାନା ।

ଅନ୍ ଲାଇନିରେ ପାଠପଢ଼ା ଏଠି,

ତା' ପାଇଁ ସାତ ସପନ ସିନା ।।

ତେଲିଆ ମୁଣ୍ଡରେ ତେଲ ପ୍ରବାଦଟା,

ଆଜି ଏ କଥାରୁ ପ୍ରମାଣ ହୁଏ ।

ଅନ୍ ଲାଇନିରେ ପାଠପଢ଼ା ହେଲେ,

ଗରିବ ପିଲାର କି ଅବା ଯାଏ ?

ଶିକ୍ଷା ପରା ଅଟେ ସମସ୍ତଙ୍କ ପାଇଁ,

ସରକାର ଏଠି କୁହନ୍ତି ଯାହା ।

ଯେଉଁ ପିଲା ପାଶେ ନାହିଁ ମୋବାଇଲ୍,

କିପରି ପଢିବ ବୁଝାଅ ଏହା ?

ଏମିତି ଶିକ୍ଷାର ହେଉ ପ୍ରସାରଣ,

ସବୁ ବର୍ଗ ପିଲା ପାଇବେ ଲାଭ ।

ତେଲିଆ ମୁଣ୍ଡରେ ତେଲ ମାରିଲେ କି,

ଏଇ ସମାଜଟା ସୁଧୁରିଯିବ ?

ଶିକ୍ଷାଦାନେ ବାଧା ନ ଉପୁଜିବାକୁ,

ଅନ୍ ଲାଇନି ପଢା ଆରମ୍ଭ ହେଲା ।

ଏ ଦୁନିଆ ଆଜି ପାରୁନାହିଁ ବୁଝି,

କେମିତି ପଢିବ ଗରିବ ପିଲା ?