କବିତାୟନ-24 : ଲେଖା ଜୀବନ ପାଏ :

ଗୀତକୁ କେହି ଗାଇଲେ ଯଦି ରଖି ତାଳରେ ସୁର,

ଜୀବନ ପାଏ ସେହି ଗୀତଟି ଫିଟାଇ ମଧୁଝର |

କବିତା ଯଦି ଆବୃତ୍ତି ହୁଏ ରସଗ୍ରାହୀ ମେଳରେ,

ଜୀବନ ପାଏ ସେହି କବିତା ରହିବ ହୃଦୟରେ |

ନାଟକ ଯଦି ମଞ୍ଚସ୍ଥ ହେଲା ଦର୍ଶକ ଥିବେ ପୂରି,

ଜୀବନ ପାଏ ସେହି ନାଟକ ମନେ ରୋମାଞ୍ଚ ଭରି |

ପ୍ରବନ୍ଧ ଲେଖା ପୁସ୍ତକ ରୂପେ ଯଦି ପ୍ରକାଶ ହୁଏ,

ଜୀବନ ପାଏ ସେହି ପ୍ରବନ୍ଧ ତଥ୍ୟକୁ ବାଣ୍ଟୁଥାଏ |

ଗପକୁ ଯଦି ଶୁଣିଲେ ଶ୍ରୋତା ନୀରବେ କାନପାରି,

ଜୀବନ ପାଏ ସେହି ଗପଟି ଦିଏ ଆନନ୍ଦ ଭରି |

କବି ଲେଖକ ଲେଖନ୍ତି ନାହିଁ ନିଜେ ପଢ଼ିବା ପାଇଁ,

ଜୀବନ ପାଏ ସେସବୁ ଲେଖା ପାଠକ ଦେଲେ ଛୁଇଁ |

ଲେଖାଟି ସିନା ଭାବ-ଶରୀର,ଭାଷା-ଶବ୍ଦରେ ଗଢ଼ା,

ଜୀବନ ପାଏ ସେହି ଭାବଟି ହେଉ ସେ ମନଗଢ଼ା |