କବିତା ଆଳାପ- 02 ଶିଶୁକନ୍ୟା

ଜନମ ଦିନରେ କିଏ କହେ ମୋତେ ହେଇଥିବୁ ବୁଢୀଟିଏ,

ଆଉ କିଏ କହେ ରହିଥିବୁ ହେଇ ହସକୁରି ଜହ୍ନଟିଏ |

ଅଜା-ଆଇ ମୋତେ କହନ୍ତି ଫୁଲେଇ ଫୁଲପରି ହେଇଥିବୁ,

ଜେଜେମା କହନ୍ତି ପରୀରାଇଜର ପରୀହେଇ ଉଡ଼ୁଥିବୁ |

ବାପା କହୁଛନ୍ତି ବଡ଼ ହେଇଗଲେ ମଙ୍ଗଳକୁ ଯିବ ସିଏ,

ଜନମ ଦିନରେ କିଏ କହେ ମୋତେ ହେଇଥିବୁ ବୁଢୀଟିଏ l

ମାଆ କହେ ପୁଣି କୁଆଡ଼େ ଯିବୁନି ହଜେଇବୁ ନାହିଁ ମନ,

ବଡ଼ ହେଇଗଲେ ନିଜ ବୁଦ୍ଧିବଳେ ରଖିବୁ ଦେଶର ମାନ |

ସାଙ୍ଗସାଥୀ ମିଶି କହୁଛନ୍ତି ତୁହି ହେବୁ ହିରୋଇନଟିଏ,

ଜନମ ଦିନରେ କିଏ କହେ ମୋତେ ହେଇଥିବୁ ବୁଢୀଟିଏ |

ପ୍ରଜାପତି ହେଇ ଉଡ଼ୁଥିବି ମୁହିଁ ନାଚିବି ମୟୂର ପରି,

ମନ କହେ ମୋର ଗାଉଥିବି ଗୀତ ସୁର ଲୟ ତାଳ ଧରି |

ବାପା-ମାଆ ପାଦେ ରଖିଥିବି ମଥା ହେବି ମୁଁ ମଣିଷଟିଏ,

ଜନମ ଦିନରେ କିଏ କହେ ମୋତେ ହେଇଥିବୁ ବୁଢୀଟିଏ |