କାନ୍ଦୁଛି ଲଣ୍ଠନ ହସେ ଏଲ୍ଇଡି

କାନ୍ଦୁଛି ଲଣ୍ଠନ ହସେ ଏଲ୍ଇଡି 

ଦାନ୍ତ ଦେଖାଇ ସେ ଧାଡି କୁ ଧାଡି 

ଏଲ୍ଇଡି କହୁଛି ଲଣ୍ଠନ ଜେଜେ

ଆଜିକାଲି କିଏ ତୁମ କୁ ଖୋଜେ 

ଜମାନା ତୁମର ଗଲାଣି ଚାଲି 

ସଭିଏଁ ତୁମକୁ ଗଲେଣି ଭୁଲି 

ତୁମ ଠୁ ଉଜ୍ଜ୍ୱଳ ଆଲୋକ ମୋର 

ଘରେ ଘରେ ମୋର ଭାରି ଆଦର 

କହିଲା ଲଣ୍ଠନ ଲୁହକୁ ପୋଛି 

ଇତିହାସରେ ମୋ ସ୍ମୃତି ରହିଛି 

ଦିନ ଥିଲା ମୋର ଥିଲା ଆଦର 

ସେବେ ତୁ ନଥିଲୁ ନାତିଆ ମୋର 

ଗାଁଆ ରୁ ସହର ପୁର ଠୁ ପଲ୍ଲୀ 

ଦିଶୁଥିଲି ଦିନେ ମୁଁ ଝିଲିମିଲି 

ଶଗଡିଆ ର ମୁଁ ପରମ ମିତ୍ର 

ସାଥିରେ ନିଏ ସେ ମୋତେ ସର୍ବତ୍ର

ଏବେ ବି ଜୀବନ୍ତ ଅସ୍ତିତ୍ବ ମୋର 

ଜଳଇ ମୁଁ ମତଦାନ କେନ୍ଦ୍ରର 

ଗରବ କରନା ଯୁବକ ମାନେ 

ପୁରାତନ ହୁଏ ନବୀନ ଦିନେ ।