ଜୟ ମୃତ୍ୟୁ ମହାତୀର୍ଥ

 ଜୀବନ ଯେଉଁଠି ଜଟିଳ ଗଣିତ

     ଖାଲି ମିଛ ଅଭିନୟ ,

ମୃତ୍ୟୁ ତ ' ସେଇଠି ସମାଧାନ ସୂତ୍ର

      ପୂର୍ଣ୍ଣତାର ବରାଭୟ ।

ଜୀବନ ଯେଉଁଠି ନୀରବ, ନିଷ୍ପ୍ରଭ

     ଶୁଖିଲା ଆଖିର କୋହ ,

ମୃତ୍ୟୁ ତ' ସେଇଠି ଚିର ସମାଧାନ

     ଶେଷ ଦୁଇ ଟୋପା ଲୁହ ।

ଜୀବନ ଯେଉଁଠି ସ୍ବାର୍ଥ ଛଳନାରେ

     ହୋଇଯାଏ ନାରଖାର ,

ମୃତ୍ୟୁ ତ ' ସେଇଠି ମୁଦ୍ରିତ ନୟନେ

      ଚିହ୍ନାଏ କେ' ଆପଣାର ।

ଜୀବନ ଯେଉଁଠି ଦୃଷ୍ଟିହୀନ ପଥ

     ଖାଲି ମୋହ ଖାଲି ଶୋଷ ,

ମୃତ୍ୟୁ ତ' ସେଇଠି ଶ୍ମଶାନ ଜୁଇର

      କେବଳ ମୁଠେ ପାଉଁଶ ।

ଜୀବନ ଯେଉଁଠି ଦୁଃଖ, ଗ୍ଲାନି, ଚିନ୍ତା

      ସ୍ମୃତିର ଦୀର୍ଘ ନିଃଶ୍ୱାସ ,

ମୃତ୍ୟୁ ତ' ସେଇଠି ଅନ୍ତିମ ଅଧ୍ୟାୟ

       ତୁଳସୀ, ଚନ୍ଦନ ବାସ ।

ଜୀବନ ଯେଉଁଠି ସାଧୁ ମୁଖାଧାରୀ

     ଚରିତ୍ରଙ୍କ କଟୁ ଭାଷ ,

ମୃତ୍ୟୁ ତ ସେଇଠି ଶତ୍ରୁଙ୍କ ଓଠରେ

    ଲିଭାଏ ଖୁସିର ହସ ।

ଜୀବନ ଯେଉଁଠି ଟାହୁଳି ,ଟାପରା

     କେତେ ମିଛ କେତେ ପାପ ,

ମୃତ୍ୟୁ ତ ସେଇଠି ଚେତାବନୀ ଦେବ

     ବିଳାପ ହୃଦୟ ଶାପ ।

ତିଳ ତିଳ କରି  ଜୀବନ ଜଳୁଛି

     ନିଗିଡ଼ି ପଡୁଛି ରକ୍ତ ,

ମାନ ,ମହତକୁ  ବଜାୟ ରଖିବ

    ଜୟ ମୃତ୍ୟୁ ମହାତୀର୍ଥ ।