ଜୟ ମା' ବିରଜା
ଜୟ ମା' ବିରଜା
ଗଙ୍ଗାଙ୍କ ଭଗୀନି ପୁଣ୍ୟ ବୈତରଣୀ
ଗୋନାସିକା ଠାରୁ ଝରି
ଉତ୍କଳର ଗଙ୍ଗା ବହିଯାଉଅଛି
ଏ ଭୂମି ପବିତ୍ର କରି l
ଆଖଣ୍ଡଳପୀଠେ ପୁଣ୍ୟତୋୟା ପୁଣି
ସାଗରେ ବିଲୟ ହୋଇ
ତା କୂଳେ ଆସ୍ଥାନ ଯଯାତି ନଗରେ
ମହାମାୟୀ ବିରଜାଇ l
ବିପ୍ର ବେଦ ମାଆ ବିରଜାଙ୍କ ସଙ୍ଗେ
ବସନ୍ତି ତହିଁ ଅଚ୍ୟୁତ
ବରାହ ରୂପରେ ବୈତରଣୀ ତୀରେ
ପଞ୍ଚ ବ'କାର ସେ କ୍ଷେତ୍ର l
ଯଯାତି ନଗର ବିଖ୍ୟାତ ଜଗତେ
କ୍ଷେତ୍ର ମଧ୍ୟେ ଅଟେ ମଣି
ଐତିହ୍ୟ ପ୍ରସିଦ୍ଧ ଯାଜପୁର ପୂର୍ବେ
ଉତ୍କଳର ରାଜଧାନୀ l
ନାଭିଗୟା ପୀଠ ଅତୀବ ପବିତ୍ର
ପିଣ୍ଡେ ପିତୃ ଯାନ୍ତି ତରି
ବାରୁଣୀ ସ୍ନାହାନ ଅଶ୍ୱମେଧ ଘାଟେ
ପୁଣ୍ୟଦାୟୀ ଅସୁମାରୀ l
ବ୍ରହ୍ମା କରିଥିଲେ ଦିବ୍ୟ ବ୍ରହ୍ମ ଯଜ୍ଞ
ନାମ ଥିଲା ଯାଗପୁର
ବରାହ ବିରଜା ଯଜ୍ଞ ଆବିର୍ଭୁତା
କଥା ଅଛି ପୁରାଣର l
ଦଶ ଅଶ୍ୱମେଧ ସମ୍ପାଦି ଯଯାତି
ପୁଣ୍ୟ ବୈତରଣୀ ତଟେ
କାନ୍ୟକୁବ୍ଜ ଠାରୁ ବିପ୍ର ଆସିଥିଲେ
ଦଶାଶ୍ୱମେଧର ଘାଟେ l
ବିରଜା ଦେବୀଙ୍କ ବାହନ ଅଟଇ
ପଶୁରାଜ ଯେ କେଶରୀ
କେଶରୀ ବଂଶକୁ ଥାପିଲେ ଯଯାତି
ଦେବୀ ଆଜ୍ଞା ଘେନା କରି l
ବିରଜା ଗିରିଜା ଭୂମିଜା ମାଆଲୋ
ବରଦାୟୀ ବିଶ୍ଵମ୍ଭରା
ତୋହର ପୟର ଭବାବ୍ଧି ନଉକା
ପ୍ରାଣୀ ଲୋଡ଼ନ୍ତି ଆଶରା l
ମାଆ ଦୟାବତୀ ଘେନ ମୋ ପ୍ରଣତି
ମଙ୍ଗଳା ମା' ଦଶ ଭୁଜା
ଜୟ ମା' ମଙ୍ଗଳା ଜଗତ ମଙ୍ଗଳେ
ଯାଜପୁରେ ଉଡ଼େ ଧ୍ବଜା l