ଜଳାଅ ଦୀପ

ଦୀପ ଜଳାଅ ଅନ୍ଧାର ହଟାଅ

   ହୃଦୟର ଅନୁକୋଣେ ।

ଜ୍ଞାନର ଜ୍ୟୋତି ଉଜ୍ଜୀବିତ ହେଉ

   ଆଜି ପ୍ରତିଟି ପରାଣେ ।।

ଜଳାଇ ଦିଅ ମନର ବିକାର

   ଜଳି ଯାଉ ହିଂସା ଦ୍ୱେଷ ।

ଜାଗ୍ରତ ହେଉ ପ୍ରାଣେ ପ୍ରାଣେ ଆଜି

   ଶାନ୍ତି ମୈତ୍ରୀ ଓ ବିଶ୍ୱାସ ।।

ଦୀପ ନୁହଁଇ ଆତ୍ମ ଜ୍ୟୋତିଟିଏ

   ଆତ୍ମାର କରଇ ପୂଜା ।

ଦେହ ସୁଖକୁ ସୁଖ ନ ବିଚାରି

   ଆତ୍ମାର ଉଡ଼ାଅ ଧ୍ବଜା ।।

ଆତ୍ମା ସନ୍ତାନ ପରମାତ୍ମା ପିତା

   ସମ୍ପର୍କ ଆମର ଭାଇ ।

ଶରୀର ରଥ ସିଏ ତ ସାରଥୀ

   ରଥକୁ ନେଉଛି ବାହୀ ।।

ଘନ ତିମିର ଜ୍ୟୋତିର ପରଶେ

    ମନରୁ ଯାଉ ଦୂରେଇ ।

ବିଶ୍ୱ ଶାନ୍ତିର ବାର୍ତ୍ତାବହ ହେଉ

    ଭାରତର ଦୀପାବଳୀ ।।