ଜହ୍ନରେ ଦିଶୁଛି ତୁମେ

ସରସୀଜ ସଜ କୁସୁମ ଲପନା

ଚମ୍ପକ ବରଣୀ ତୁମେ ଅନୁପମା

    ପ୍ରେମ ନଦୀ ତୀରେ ବେଳାଭୂମି ମୁଁ ଯେ

    ତୁମେ ନୀଳ ଉର୍ମୀ ମାଳା ଗୋ ବରେଣ୍ୟା

ଚୂର୍ଣ୍ଣ ଘନ ଦୀର୍ଘ କେଶିନୀ ସୁନ୍ଦରୀ

       ଆଗୋ ନୀଳୋତ୍ପଳା ନୟନା

ସରସୀଜ ସଜ କୁସୁମ ଲପନା ।

ବିମ୍ଵୋଷ୍ଠୀ ସୁଧିରା ଚଞ୍ଚଳା ଅବଳା

ଲବଣୀ ପିତୁଳା ଅବା ଚନ୍ଦ୍ରକଳା

       କୋକିଳ ପଞ୍ଚମ ସ୍ଵର ଅନୁପମ

       ମନକୁ କରେ ଚୋରୀ ନବ ଛଇଳା

ଚାରୁକଳା ଶିଳା କରଇ ବାଉଳା

        ସୁଧର୍ମା ସଭାର ସେ କି ଅପ୍ସରା

ବିମ୍ଵୋଷ୍ଠୀ ଚଞ୍ଚଳା ନବ ଛଇଳା ।

ଅମ୍ଵରେ ମେଦୁର ବନରେ ମୟୂର

ଅଭୁଲା ପିରତୀ ନାହିଁ ପଟାନ୍ତର

        ଇନ୍ଦୁ କୁମୁଦିନୀ ମାର୍ତ୍ତଣ୍ଡ ପଦ୍ମିନୀ

        ତେମନ୍ତେ ତୁମେ ମୋ ପ୍ରିତି ମନ୍ଦାକିନୀ

ପଣତ ଘୋଡାଇ ବାନ୍ଧିଛ ମାନିନୀ

           ମୋତେ କରି ଗଳା ମାଳ

ଅମ୍ଵରେ ମେଦୂର ବନରେ ମୟୂର । 

ଦଶଦିଶେ ଦିଶେ ତୁମରି ଛଟକ

ବିଦେଶି ପଥିକ ହୁଅଇ ଅଟକ

        ରୁଚିର ଲାବଣ୍ୟ ଅପରୂପ ରେଖ

        ଦିଶଇ ସତେକି ମୋନାଲିସା ଚିତ୍ର

ସୁରମ୍ୟ ବିଥି ରେ ଫୁଲର ମହକ

          ପୁଷ୍ପ ରେଣୁ ଝରା ଝଲକ

ଦଶଦିଶ ଦିଶେ ତୁମରି ଛଟକ ।

ମୋ ଦେହର ଛାଇ ସମ ପ୍ରତିକ୍ଷଣେ

ତୁମେ ଅଛ ସଖୀ ଥିବ ମୋ ଜୀବନେ

            ଅଭୁଲା ତୁମର ମୋର ୟେ ବନ୍ଧନ

            ତୁମେ ମୋ ଜୀବନ ନିଦାଘେ ଚନ୍ଦନ

ଯେଣେ ଚାହେଁ ତେଣେ ଦିଶୁଛ ସଜନୀ

                ଏବେ ଜହ୍ନରେ ଦିଶ ତୁମେ

ମୋ ଦେହର ଛାଇ ସମ ପ୍ରତିକ୍ଷଣେ ।