ଜାଣିଛକି
ଜାଣିଛକି
ଜାଣିଛକି ପିଲେ ଦେବଭୂମି ବୋଲି
ପରିଚିତ ଆମ ଦେଶ
ଜାଣିଛକି ପିଲେ ଗୋ ଗଂଗା ଗାୟତ୍ରୀ
ମାଆ ସମ ଆମ ଦେଶ ।
ଜାଣିଛକି ପିଲେ ଦେଶ ମାତୃଭୂମି
କେବଳ ଆମରି ଦେଶେ
ଜାଣିଛକି ପିଲେ ନାରୀ ବନ୍ଦନୀୟା
କେବଳ ଆମରି ଦେଶେ ।
ଜାଣିଛକି ପିଲେ ନଦୀ ପରବତ
ପୂଜାପାଏ ଆମ ଦେଶେ
ଜାଣିଛକି ପିଲେ ପିତା ମାତା ଗୁରୁ
ଈଶ୍ୱର ସମ ଏ ଦେଶେ ।
ଜାଣିଛକି ପିଲେ ଓଁକାର ମହତ୍ୱ
ପାଇଛି ଆମରି ଦେଶେ
ଜାଣିଛକି ପିଲେ ସର୍ବେ ଭବନ୍ତୁ
ସୁଖିନଃ ଏ ଦେଶ ଭାଷେ ।
ବେଦୋପନିଷଦ ମୁନି ଋଷି ଆମ
ସଂରଚନା କଲେ ହେଳେ
ଚରକ ଶୁଶୃତ ଆୟୁର୍ବେଦ ଶାସ୍ତ୍ର
ବିଶ୍ୱ ସଭ୍ୟତାକୁ ଦେଲେ ।
ଅଣୁ ପରମାଣୁ ମହୀୟାନ ବୋଲି
ଚିହ୍ନାଇଲା ଆମ ଦେଶ
ଶୂନର ମହତ୍ୱ ସାରା ଜଗତକୁ
ଜଣାଇଛି ଆମ ଦେଶ ।
ସଂଖ୍ୟାର ଗଣତି ବୀଜ ଗଣିତ ବି
ଅବଦାନ ଆମ ଦେଶ
ବୈଦିକ ଗଣିତ ହିସାବ କରଇ
ଯାନ ଚାଲେ ମହାକାଶ ।
ଆମ ଦେଶ ଥିଲା ସାରା ଜଗତର
ଆଲୋକ ବର୍ତ୍ତିକା ଦିନେ
ପୂର୍ବ ପୁରୁଷଂକ ମହିମା ଆମର
ପଡ଼ୁ ନାହିଁକିରେ ମନେ ।