ଜାଗୃତି

ଜନହିତେ ଦୀପଟିଏ ଜାଳି ଜାଗୃତି ର 

ଜଗେଇବା ଜନମନେ ମନ୍ତ୍ର ଜୀଇଁ ବାର 

ଜମିଥିବା କୁସଂସ୍କାର ଜତନରେ ପୋଛି ଦେଇ 

ଜତେଇବା ମାନବର ଅଛି କି କି ଅଧିକାର ।

ନାରୀ ବା ପୁରୁଷ ହେଉ ବୃଦ୍ଧ କି ଜବାନ 

ହିନ୍ଦୁ ଶିଖ୍ ମୁସଲିମ ଅବା ଖ୍ରୀଷ୍ଟିଆନ 

ଜାତି ଧର୍ମ ଉଚ୍ଚ ନିଚ୍ଚ ଭେଦ ଭାବ ନାହିଁ 

ବଂଚିବାର ଅଧିିକାରେ ସଭିଏଁ ସମାନ ।

ସ୍ବାଧୀନ ଆହାର ପୁଣି ସ୍ବାଧୀନ ବିହାର 

ଶିକ୍ଷା ଦୀକ୍ଷା ଗ୍ରହଣ ରେ ସମ ଅଧିକାର 

ନିଆଁ ପାଣି ରାସ୍ତା ଘାଟେ ନାହିଁ କଟକଣା 

ସର୍ବ ସାଧାରଣ ସମ୍ପତ୍ତିରେ ସବୁ ହକଦାର ।

ଦାନା ମୁଠେ କପଡାଟେ ମୁଣ୍ଡ ଗୁଞିବାକୁ ଘର 

ସସମ୍ମାନେ ମୁଣ୍ଡ ଟେକି ବାଟ ଚାଲିବାର 

ଅଧିିିକାର ଅଛି, ଆମ ଅଧିକାର ଅଛି 

କଥା କହିବାର । ନ୍ୟାଯ୍ୟ ଦାବି ପାଇବାର ।

କିଣା ବିକା ବନ୍ଦ ଆମେ ନୁହେଁ ପଣ୍ୟଦ୍ରବ୍ୟ 

ବେଠି ଖଟିବେନି କେହି, ଶିଶୁ ନିଯୁକ୍ତି ନିଷେଧ

କନ୍ୟା ସନ୍ତାନ ଟେ ଆଦୌ ଅବାଞ୍ଛିତ ନୁହେଁ 

ବୃଦ୍ଧ ପିିତା ମାତା ନୁହେଁ, ନୁହେଁ କେବେ ବୋଝ ।

ଅକାରଣେ ଦଣ୍ଡ ନ ପାଉ ନିର୍ଦ୍ଦୋଷ 

ଦୁର୍ବଳ ଟେ ଯୁଗେ ଯୁଗେ ନ ହେଉ ଶୋଷିତ 

ଲଜ୍ଜା ଅପମାନେ ଜର୍ଜରିତା ନ ହେଉ ପୀଡିତା 

ଦୁଷ୍କର୍ମ କରିଛି ଯିଏ ହେଉ ସେ ଲଜ୍ଜିତ ।

ଭୁଲ୍ କରିବାନି, ସହିବାନି ଭୁଲ୍ ଦେଖି 

ସ୍ବର ଉତ୍ତୋଳନ କଲେ ପାପୀ ପାଏ ଶାସ୍ତି 

ହାତ ଗୁଞ୍ଜା ଦେବାନାହିଁ ନେବା ନାହିଁ ଲାଞ୍ଚ 

ସତ୍ୟ ର ବ୍ରତୀ ଆମେ ଶତ୍ରୁ ଆମ ଅନ୍ୟାୟ ଅନୀତି ।

ଅଧିକାର ଜାଣିନେବା ଜାଣିବା କର୍ତ୍ତବ୍ୟ 

ମଣିଷ ପଣିଆ ଆମ ନ ହେଉ ହନ୍ତବ୍ୟ 

ଲିଭିଯାଉ ଆତଙ୍କର ଲେଲିହାନ ଶିଖା 

ପ୍ରତି ହୃଦେ ଜାଗିଉଠୁ ପ୍ରେମ ମୈତ୍ରି ଭାବ ।