ଜାଗ୍ରତ ହୁଅ ଓଡ଼ିଆ

ଐର ଖାରବେଳ   କପିଳେନ୍ଦ୍ର ଦେବ

     ଓଡ଼ିଆ ଜାତି ଗୌରବ

ତାଙ୍କରି ସନ୍ତାନ   ଉତ୍କଳ ସମ୍ମାନ

     ଆନନ୍ଦେ କରୁ ଗରବ ll

ଏବେ ସ୍ୱାର୍ଥ ନୀତି   ମୋହରେ ସମ୍ପତ୍ତି

     ବିବେକକୁ ଦେଉ ବିକି

ଟଙ୍କାର ଲାଳସା   ପଦବୀର ନିଶା

     ଇଜ୍ଜତକୁ ଦେଉ ଟେକି ll

କାମ ଲୋଭ ରଜ୍ଜୁ   ଛିଣ୍ଡାଇ ଫାସକୁ

      ଜାଗି ଉଠ ବୀର ଜାତି

ଅତୀତର ଗାଥା    ବଂଶ ଅନୁଚିନ୍ତା

      ଲଗାଅ ନିଜର ମତି ll

ମାଗଣାର ଖାଦ୍ୟ    ଧନୀଙ୍କ  ଆଦୃତ

      ହୀନ କା6ର୍ଯ୍ୟ ଖୁସି ମନ 

ବିପିଏଲ ଧାରୀ   ଏଠି କୋଟିପତି

     ହାତ ପାତେ ଲଜ୍ଜା ହୀନ ll

ପଦବୀ  ପାଇଁକି    ମୁଣ୍ଡିଆ ମାରିକି

     ଭିକ୍ଷା ମାଗେ ଜନ ମତ

ନିରୀହ ଓଡ଼ିଆ   ପାଇ ମାଂସ ଟଙ୍କା

     ପରୋଚିତ ନିଜ ମତ ll

ପାଇ ଜନ ମତ   କରେ ନିଜ ହିତ

     ଆଦର୍ଶ କେବଳ ତୁଣ୍ଡ

ଜାତୀୟ ସମ୍ପତ୍ତି   ଲୁଣ୍ଠେ ଦିନ ରାତି

     କୁଟ କପଟରେ ମୁଣ୍ଡ ll

ମୁଷ୍ଟିମେୟ ଆଜି   ସତ୍ୟର ପୂଜାରୀ

      ଭ୍ରଷ୍ଟାଚାରି ନ୍ୟାୟ ପତି

କରେ ଅତ୍ୟାଚାର   ନକରି ବିଚାର

       ନୀରବ ଓଡ଼ିଆ ଜାତି ll

ଭାଷା କବଳିତ    ଓଡ଼ିଆ ଲାଂଛିତ

      ବିଦେଶୀର ଅନୁଗତ

ଭୁଲିକି  ସଂସ୍କୃତି    ଅନ୍ୟ ଭାଷା ପ୍ରୀତି

      ଧର୍ମ ହୀନ କାର୍ଯ୍ୟରତ ll

  

ଜଗନ୍ନାଥ ଦେଶ   ଓଡିଶା ପ୍ରଦେଶ

      ବିଶ୍ୱରେ ସଦା ବନ୍ଦିତ

ଏବେ ହୀନିମାନ    ଚରିତ୍ର ସ୍ଖଳନ

       ଅଶିକ୍ଷାରେ କବଳିତ ll

ହୁଅରେ  ଜାଗ୍ରତ    ଦେଖୁଯେ ଜଗତ

      ସତ୍ୟ ଧର୍ମ ଜାତି ପ୍ରେମ

ସ୍ୱାର୍ଥ ତ୍ୟାଗ ଦାନ    ବ୍ରତରେ ଜୀବନ

       ଓଡ଼ିଆର ରଖ ନାମ ll