ହୋମ୍ ଡେଲିଭରି
ହୋମ୍ ଡେଲିଭରି
ଦିନ ବାର ତିଥି ଫିକ୍ସ ହୋଇଲାଣି
ଶୁଭ ବିବାହ ଲଗନ
ସାଜି ଗୃହଲକ୍ଷ୍ମୀ ଆସିବ ମୋ ଘର
ଦେଖିବି ଚନ୍ଦ୍ର ବଦନ
ଉଚ୍ଛନ୍ନ ହେଲାଣି ମନ
ଆଜିର ଚିତ୍ରଣ ଦେଖି ଭାବିହୁଏ
ମୁଣ୍ଡଟା ମୋ ଟେନ୍ସନ ।
ମହାମାରୀ ଆଜି ଦାଉ ସାଜିଅଛି
ସରାଗ ରହୁନି ମନେ
ବହୁ କଟକଣା ଗାଇଡି ଲାଇନ
ସର୍କୁଲାର ପ୍ରତିଦିନେ
ସରକାରୀ ନିର୍ଦ୍ଦେଶ ନାମା
ବାଜା ବାଣ ନାଚ କିଛି ହେବନାହିଁ
ଭୋଜି ଗେଦରିଂ ମନା ।
ରଙ୍ଗବତୀ ତାଳେ ନାଲି ପାଣି ପିଇ
ନାଚିବେନି ଢ଼ଳିଢଳି
ବେଦିରେ ଭିଡ଼ିଓ ସୁଟିଙ୍ଗ ହେବନି
ନଥିବ ପାଖରେ ଶାଳୀ
ସାରା ଜୀବନଟା ଭାଳି
ନିଜକୁ ଧିକ୍କାର କରୁଥିବି ସିନା
କରମକୁ କରି ଗାଳି ।
କି କିଳା ମାଇଲୁ କରୋନା ରୂପସୀ
କରୁଛୁ ନିଇତି ରାସ
ଘରଣୀ ବଦନ ଦେଖି ପାରିବିନି
ନାଲି ଲିପିଷ୍ଟିକ ଲେସ
ତୁଣ୍ଡରେ ବାନ୍ଧିଛି ମାସ୍କ
ଡିଷ୍ଟାଂଶ ମେଣ୍ଟେନ୍ସ ଛୁଇଁବାକୁ ମନା
ଚଉଠି କରିବି କିସ ।
ବହୁ ଚିନ୍ତାକରି ନିର୍ଣ୍ଣୟ ନେଲିମୁ
ଜଣାଇବି କନ୍ୟାପିତା
ଲକ୍ ଡାଉନ୍ ରେ ବିବାହ ଲଗନ
ବଢ଼ାଇଛି ମୋର ଚିନ୍ତା
ମେସେଜ ଫୋନରେ କରି
ହେ ମୋର ଶଶୁର ମାଇଣ୍ଡ ନକରି
ଦିଅ ହୋମ ଡେଲିଭରି ।