ଲାଇବ୍ରେରୀ
ପ୍ରୋଫାଇଲ୍
ହୋଲିରେ ହୋଲି
ହୋଲିରେ ହୋଲି
ହୋଲିରେ ହୋଲି
ଅବିର ରଙ୍ଗର ପସରା ମେଲି
ଆସୁ ତୁ ଦୋହଲି ଦୋହଲି
କେତେ ରଙ୍ଗ ତୋର
ସବୁଜ ବାଇଗଣି ଗୋଲାପୀ
ହଳଦିଆ ନୀଳ ଘନନୀଳ ନାଲି
ମଳୟ ବହେ ସୁଲୁ ସୁଲୁ
ପ୍ରେମ ଫୁଲ ଫୁଟେ ପାଖୁଡା଼ ମେଲି
ମନ ହୁଏ କୁତୁ କୁତୁ
ଆସିଛି ପରା ବସନ୍ତ ଋତୁ
ଭାବ ବିହ୍ଵଳ କରେ ଗାଇ କୋଇଲି
ହୋଲିରେ ହୋଲି
ମୋ ପ୍ରିୟା ନବ ନହୁଲୀ
ପଲକେ ଝଲକେ ଚଇତି ମଲ୍ଲୀ
ମହକେ ତାର ଝୁଲି ଝୁଲି
ଅକୁହା କଥା କହିଦିଏ ଖୋଲି
ସୁନ୍ଦର ପୋଷାକ ତାର ଝିଲିମିଲି
ଲାଜେଇ ଲାଜେଇ ହସେ ଖିଲି ଖିଲି
ତା' ମୁହେଁ ବୋଳି ଦେଲେ ରଙ୍ଗ
ସରମେ ନରମି ଯାଏ ପାଖରୁ ଚାଲି
ହୋଲିରେ ହୋଲି
ରଙ୍ଗରେ ଅଙ୍ଗ ଭଳି କି ଭଳି
ରଙ୍ଗ ବୋଳା ମୁହଁ ଦିଶେ ନକଲି
ଚିହ୍ନା ଲାଗେ ଅଚିହ୍ନା
ଲୁଚି ଛପି ଯାଏ କିଏ ଅସଲି
ରଙ୍ଗ ରଙ୍ଗେଇ ଦିଶେ ରଙ୍ଗେଲୀ
ହୋଲି ଦିଏ ବୁଝେଇ
କପଟ କରନା କା' ସାଥେ
ରଙ୍ଗ ବେରଙ୍ଗ କରି ଦେବ ସବୁ
ଜୀବନଟା ଲାଗିବ ଖାଲି ଖାଲି
ହୋଲିରେ ହୋଲି
ଦେହ ରଙ୍ଗ ଧୋଇଦେଲେ ଯିବ ଚାଲି
ମନରେ ଲଗାଅ ରଙ୍ଗ
ଶାନ୍ତି ମୈତ୍ରୀ ପ୍ରୀତି ଯିବନି ଭୁଲି
ହସ ଖୁସି ଆନନ୍ଦରେ ଦିନ ବିତାଇ
ସାରା ସଂସାର ମଧୁମୟ ହେବ
ଯେବେ ଯୁଆଡେ ଯାଅ ବୁଲି
ପ୍ରେମ କେବେ ହୁଏ ନାହିଁ ନକଲି
ଭଲ ପାଇଲେ ଭଲ ପାଇବା ମିଳେ
ଭାବର ଦୁନିଆଁ ଏ ଦେଖ ଆଖି ଖୋଲି
ମନଟାକୁ କରି ସୁନେଲୀ ସୁନେଲୀ
ହୋଲିରେ ହୋଲି ।
