ଲାଇବ୍ରେରୀ
ପ୍ରୋଫାଇଲ୍
ହେରା ପଞ୍ଚମୀ
ହେରା ପଞ୍ଚମୀ
ରଥଯାତରାରେ ପ୍ରଭୁ ଜଗନ୍ନାଥ
ଭାଇ ଭଉଣୀ ସହିତ ।
ଜନମ ବେଦୀକୁ ଚଳିଲେ ତାଙ୍କର
ପାବନ ହେଲେ ପତିତ ।
ଲକ୍ଷ୍ମୀଙ୍କୁ ସାଙ୍ଗରେ ନେଲେ ନାହିଁ ବୋଲି
ମହାଲକ୍ଷ୍ମୀ ରୁଷ୍ଟା ହେଲେ ।
ଶ୍ରୀକ୍ଷେତ୍ର ରାଜେଶ୍ୱରୀ ତାଙ୍କ ଭଗିନୀ
ବିମଳାଙ୍କୁ ଜଣାଇଲେ ।
ଭାଇ ଭଗ୍ନୀ ସଙ୍ଗେ ଶ୍ରୀଗୁଣ୍ଡିଚା ଯାତ୍ରା
କରି ମହାପ୍ରଭୁ ଗଲେ ।
କି କରିବି କହ ଭଉଣୀ ଏବେ ମୁଁ
ସାଙ୍ଗରେ ମୋତେ ନ ନେଲେ ।
କେତେ ଦିନେ ସେ ଆସିବେ ନ ଆସିବେ
ବୁଦ୍ଧି ମୋତେ ଦିଶୁନାହିଁ ।
ଏଡେ ଅବିବେକୀ ହେଲେ କାହିଁକି ସେ
କି କରିବି କହ ମୁହିଁ ।
ବିମଳା କହିଲେ ମୋହ ଚୂର୍ଣ୍ଣ ତାଙ୍କ
ଉପରେ ଦିଅ ପକାଇ ।
ଶ୍ରୀମନ୍ଦିରକୁ ସେ ନିଶ୍ଚିତ ଫେରିବେ
କିଛି ଉପାୟ ନ ପାଇ ।
ହେରା ପଞ୍ଚମୀରେ ଲକ୍ଷ୍ମୀ ନାରାୟଣୀ
ରାତି ହୋଇଯିବା ପରେ ।
ଲୁଚି ଲୁଚି ସେବକ ସହ ମିଳନ୍ତି
ଯାଇ ଗୁଣ୍ଡିଚା ମନ୍ଦିରେ ।
ଶ୍ରୀଜଗନ୍ନାଥଙ୍କୁ ହେରି ମୋହ ଚୂର୍ଣ୍ଣ
ତାଙ୍କ ଉପରେ ପକାଇ ।
ରୁଷ୍ଟା ହୋଇ ଆଜ୍ଞା ମାଳ ପାଇ ସାରି
ରଥକାଠ ଭାଙ୍ଗି ଦେଇ ।
ହେରା ଗୋହିରୀ ସାହି ଦେଇ ଫେରନ୍ତି
ଘଣ୍ଟ ଘଣ୍ଟା ବାଜେ ନାହିଁ ।
ହେରା ପଞ୍ଚମୀର ମାହାତ୍ମ୍ଯ ଜାଣିବା
ମହା ଲୋକ ଶିକ୍ଷା ଏହି ।
ପତି ଅବିବେକୀ ହେବେ ଯଦି ପତ୍ନୀ
କରି କଳ କଉଶଳ ।
ମୋହନ ଉଚ୍ଚାଟନ କରି ତାହାଙ୍କୁ
କରିବ ସର୍ବ କୁଶଳ ।
ପରସ୍ପର ପ୍ରେମ ଅତୁଟ ରଖିବ
କ୍ରୋଧକୁ ଚାପି ନିଜର ।
ପରାମର୍ଶ ନେବ ନିଜ ଆତ୍ମୀୟଙ୍କ
ଯାହାକୁ ଭାବ ନିଜର ।
ସବୁ ବିଷମୟ ପରିସ୍ଥିତି ହଟି
ସୁଦିନ ନିଶ୍ଚେ ଆସିବ ।
ଲକ୍ଷ୍ମୀ ଜଗନ୍ନାଥ ହେରା ପଞ୍ଚମୀର
ମାହାତ୍ମ୍ଯ ମନେ ରଖିବ।
ବହୁ କଟୁକଥା ମାତା ମହାଲକ୍ଷ୍ମୀ
ଜଗନ୍ନାଥଙ୍କୁ କହିଲେ ।
ତିନିଦିନ ପରେ ମନ୍ଦିର ଫେରିବା
ପ୍ରତିଶ୍ରୁତି ପ୍ରଭୁ ଦେଲେ ।
ତହିଁ ପରଦିନ ରଥମାନଙ୍କର
ଦକ୍ଷିଣୀ ମୋଡ ହୋଇଲା ।
ବାହୁଡା ଯାତ୍ରାର ସମସ୍ତ ବ୍ୟବସ୍ଥା
ସୁଚାରୁ ରୂପେ ଚାଲିଲା ।
ବାହୁଡା ଯାତ୍ରାରେ ବିଜୟ ହୋଇବେ
ଚଉଦ ଭୁବନ ସାଇଁ ।
ମାତା ମହାଲକ୍ଷ୍ମୀ ଦିନ ଗଣୁଛନ୍ତି
ପ୍ରଭୁଙ୍କ ବାଟକୁ ଚାହିଁ ।
ଆସିଲା ସୁଦିନ ହଟିଲା ଦୁର୍ଦ୍ଦିନ
ଫେରିଲେ ବ୍ରହ୍ମାଣ୍ଡ ନାଥ ।
ଲକ୍ଷ୍ମୀ ନାରାୟଣ ବଚନିକା ପରେ
ହୃଷ୍ଟା ହେଲେ ଜଗନ୍ମାତ ।
