ଗଉରା ସାହୁ
ଗଉରା ସାହୁ
ଗଉରା ସାହୁ
କଲେଜ ବାରଣ୍ଡା ମାଡ଼ିଲା ଦିନଠୁ
ବଡ଼ ସାନ ଜମା ମାନୁନି ଆଉ ।
ମୁହଁକୁ ଛିଞ୍ଚାଡି ଦେଉଛି ଜବାବ
ଭଲ କଥା କିଏ କହିଲେ ପଦେ,
ଆର ସାହି ଆଡେ ନିଇତି ଯାଉଛି
ସୁକୁଟି ପ୍ରେମରେ ପଡ଼ିଛି ବୋଧେ !
ଘାଆକୁ କୁଣ୍ଡେଇ ଲେଖୁଛି ଲେଟର
ଭେଣ୍ଡିଆ ପୁଅର ବଢିଲା ଭାଉ,
ଗୁଟଖା ଖଇନି ଖାଉଛି ପାକୁଳି
କହିଲେ କହୁଛି ସେତିକି ଥାଉ ।
ଗଉରା ସାହୁ
ନିଶ ଦାଢି ତାର ଉଠିଲା ଦିନଠୁ
ବଡ଼ ସାନ ଜମା ମାନୁନି ଆଉ ।
ବାରବୁଲା ପରି ବୁଲୁଅଛି ଖାଲି
ବାପାଙ୍କ କାମରେ ଦେଉନି ହାତ,
ଜେଜେ ଭାଗବତ ପଢିଲା ବେଳକୁ
ନାତି ଗାଉଅଛି ସିନେମା ଗୀତ !
ଏକୋଇର ବଳା ବିଶିକେଶନ ସେ
ପକେଟ୍ ଖରଚ ଦେଉଛି ବୋଉ,
ବୋଉ କି ଜାଣିବ ପଇସା ନେଇଣ
କି ମହାନ କାମେ ଲଗାଏ ସେହୁ ?
ଗଉରା ସାହୁ
ଯଉବନ ତାକୁ ଛୁଇଁଲା ଦିନଠୁ
ବଡ଼ ସାନ ଜମା ମାନୁନି ଆଉ ।
ଝିଙ୍କ ପରି ବାଳ ଷ୍ଟାଇଲି କରିଛି
ଚୁଚୁନ୍ଦ୍ରା ମୁହଁକୁ ମାନୁଛି ଭାରି
ଫଟା ଜିନ୍ ପ୍ୟାଣ୍ଟ୍ ପିନ୍ଧି ବାହାରୁଛି
ଦେଖିଲେ ଲାଗୁଛି ନୂଆ ଭିକାରୀ ।
ବଡଙ୍କୁ ଟିକିଏ ସମ୍ମାନ ଦେଉନି
ପାଦକୁ ଛୁଇଁବା ଦୂରରେ ଥାଉ,
ଗଉରାକୁ ଟିକେ ଭଲ ବୁଦ୍ଧି ଦିଅ
ଏତିକି ବିନତି ହେ ମହାବାହୁ ।।
ବି.ଦ୍ର : କବିତାଟି କୌଣସି ବ୍ୟକ୍ତି ବିଶେଷଙ୍କ ଉଦ୍ଦେଶ୍ୟରେ ଲେଖା ଯାଇ ନାହିଁ । କେବଳ ସଚେତନତା ସୃଷ୍ଟି ହିଁ କବିତାର ମୂଳ ଲକ୍ଷ୍ୟ ।