ଗୁମରି କାନ୍ଦୁଛି ଭାରତ ମାଆ
ଗୁମରି କାନ୍ଦୁଛି ଭାରତ ମାଆ
ଅଖଣ୍ଡ ଭାରତ ସଂସ୍ଥାପନ ପାଇଁ
ଏବେବି ଜଳୁଛି ଦେଶରେ ନିଆଁ,
ଧରମ ଭିତ୍ତିରେ ଦଙ୍ଗା ଚାରିଆଡେ
ଗୁମୁରି କାନ୍ଦୁଛି ଭାରତ ମାଆ |
ସନ୍ତ୍ରାସ ବାଦର ଗୁଳି ସୀମାନ୍ତରେ
ମରୁଛନ୍ତି ନିତି ନିରୀହ ଲୋକେ,
ଉଜୁଡି ଗଲାଣି କେତେ ଯେ ସଂସାର
ଘରଛାଡି କିଏ ମଲାଣି ଭୋକେ |
ହୀନ ରାଜନୀତି ଚାଲିଛି ଦେଶରେ
ଛଳନାର ମୁଖା ପିନ୍ଧି ମୁହଁରେ,
ମଣିପୁର ଆଜି ଅଶାନ୍ତେ ଜଳୁଛି
ଲୁହର ଝରଣା ନାରୀ ଆଖିରେ |
ସମ୍ବାଦ ପତ୍ରରେ ନିତି ଛପାହୁଏ
ନାରୀ ନିର୍ଯ୍ୟାତନା କଳଙ୍କ ଗାଥା,
କେଉଁଠି ତ ନାରୀ ସତୀତ୍ୱ ହରାଏ
କେବେ ବି ନୀରିହା ହୁଅଇ ହତ୍ୟା |
ହିନ୍ଦୁ ସଂସ୍କୃତି ବି ଦୋହଲି ଗଲାଣି
ନିଶାର କବଳେ ତାରୁଣ୍ୟ ହଜେ,
ପିତାମାତା ଆଜି ସୁଧାର ଗୃହରେ
ଆଖିର ଲୁହରେ ଅତୀତ ଖୋଜେ |
ଦେଶର ଜନତା ବୁଝେନାହିଁ କିଛି
ଚାଲିଛି ନିଜର ଭାଗ୍ୟ ଆଦରି,
ପ୍ରଚାର ସର୍ବସ୍ବ ମିଥ୍ୟା ପ୍ରଲୋଭନ
ଦେଖୁଛି ଆଖିରେ ନୂଆ ତସ୍କରୀ |
ଝୁରୁଛି ଅତୀତ ଖୋଜୁଛି ସଂସ୍କୃତି
ଇତିହାସ ପୃଷ୍ଠା ଗଲାଣି ଚିରି,
କାନ୍ଦୁଛି ମାଟି ମା' ଗୁମୁରି ଗୁମୁରି
ହୃଦୟେ କୋହକୁ ଅଧୀରେ ଭରି |