ଗରିବ
ଗରିବ
ଲୋକେ ଦେଇଛନ୍ତି ମହୁକା ଆମକୁ
ଏଥର ଆମର ପାଳି
ତମର କାହିଁକି ଦେହକୁ ଯାଉନି
ତୁଛାଟାରେ ଦିଅ ଗାଳି ।
ତୁମେ ଖାଉଥିଲ ଆମେତ ଖାଉଛୁ
କରନାହିଁ ଜମା ପାଟି
ହାତରେ ହାତକୁ ମିଶାଇ ଦିଅହେ
ଦୁନିଆକୁ ଦେବା ଚାଟି ।
ଗରିବଙ୍କ କଥା ଭାବୁଛ କାହିଁକି
ଭୁକୁଥାନ୍ତୁ ଦିନରାତି
ତାଙ୍କ ପାଇଁ କାନ୍ଦି କୁମ୍ଭୀର କାନ୍ଦଣା
ଖାଉଥିବା ତାଙ୍କୁ ଲୁଟି ।
ଦେଶ ବିଦେଶରେ ଗରବରେ ଆମେ
ଗରିବୀ କୁ ଆମ ବିକି
ତାଙ୍କ ପାଇଁ ଆଣି ବିଦେଶୀ ସାହାଯ୍ୟ
ବଢାଇବା ଆମ ପାଣ୍ଠି ।
ବିଦେଶରେ ଆମେ ଧନ ଜମାଇବା
ଲୋକଙ୍କୁ ଗରିବ କରି
ବରଷୁ ବରଷ ବଢାଇ ଚାଲିବା
ବିପିଏଲ୍ କାର୍ଡଧାରୀ ।
ସାତ ପୁରୁଷକୁ ଧନ ସାଇତିବା
ଗରିବ ଢାଳନ୍ତୁ ଲୁହ
ସୁଯୋଗ ମିଳିଛି ବୁଝିବା କାହିଁକି
ଗରିବ ବୁକୁର କୋହ !