ଗୋଧୂଳି ଆଜି ଫିକା ପଡିଛି

ଗୋଧୂଳି ସମୟ ପ୍ରଶମିତ ଆଜି

        ଗାଁ ଦାଣ୍ଡ ଖାଲି ଖାଲି

ମଫସଲ ଭୂଲି ସହର ମୁହାଁ ଯେ

      ଜନ୍ମ ଭୂଇଁ ଗଲେ ଭୂଲି

ଶୁଭେ ନାହିଁ ଆଉ ଶୁଭ ଶଙ୍ଖ ଧ୍ୱନି

     ଜଳୁ ନାହିଁ ସଞ୍ଜ ବତି

ଗ୍ରାମ ଦେବା ଦେବୀ ପୂଜା ନ'ପାଆନ୍ତି

    ଚାଲିଛି ଅଜବ ନିତି

ଗାଁ ତୁଠ ପଥର ଶୁଖିଲା ପଡିଛି

   କୁଆଁରୀ ଆସନ୍ତି ନାହିଁ

ଗୋଧୂଳି ଲଗନ ଫିକା ପଡିଯାଏ

   ସନ୍ତାନଙ୍କ ରାସ୍ତା ଚାହିଁ

ରଜ ଦୋଳି କଟ ମଟ ହୁଏ ନାହିଁ

   ବାସେନି ପିଠା ମହକ

ପିଜା ବର୍ଗରରେ ମନ ଛଟପଟ

   ମୋମୋ ଖାଇବା ସଉକ

ଗାଁ ପରିଚୟ ଦେବା ପାଇଁ ଆଜି

     ଲାଜ କରୁଅଛି ପୁଅ

ଗାଉଁଲି ଆକ୍ଷାଟି କାଳେ ମିଳିଯିବ

   ଭାଳୁଛି ଗ୍ରାମର ଝିଅ

ଗୋଧୂଳି ବେଳରେ ଗୋଠକୁ ଫେରୁନି

    ଗୁହାଳକୁ କାଳୀ ଗାଈ

ଗୁହାଳ ଗୋବର ଦିଶୁ ନାହିଁ ଆଉ

    ଦିଶେ ଆଧୁନିକ ଛଇ

ସେ କାଳ ଏ କାଳ ତଫାତ ପ୍ରବଳ

    ଆଧୁନିକ ରଙ୍ଗ ବୋଳା

ଗୋଧୂଳି ସମୟ ଫିକା ପଡିଯାଇ

    ଗାଁ ଦାଣ୍ଡ ଆଜି ଫୁଙ୍ଗୁଳା