ଶୀତ ରାତି

ଶୀତ ଆସେ ଧାଇଁ

ସଂଜ ଗଲେ ନଇଁ

ନୁଆଣିଆଁ ଚାଳ ଘରକୁ ,

ପିନ୍ଧା କାନି ଟାଣି

ଚାଦର କଲାଣି

ଲାଜ ଦେଇ ଦେଇ ପରକୁ ।

ସଜନୀ ରଜନୀ

ଆସେ ଶୀତ ଘେନି

ସଜ କର ଶେଯ ବାଗେଇ ,

ହାଡ଼ ଭଙ୍ଗା ଶୀତ

ରାତିରେ ବହୁତ

ଜଡ଼େଇ ଧରୁଛି କୁନ୍ଥେଇ ।

ଶୀତୁଆ ସଂଜରେ

ଫୁଙ୍ଗୁଳା ଦେହରେ

ପାଗଳାଟେ ରାସ୍ତା କଡ଼ରେ,

ଥରୁଛି ଶୀତରେ

ଭିଜୁଛି ଶିଶିରେ

ପଶି ଯାଏ ଶୀତ ହାଡ଼ରେ ।

ଅଳିଆ ଓଳେଇ

ଏକାଠି ଜଳେଇ

ସେକି ହୋନ୍ତି ଥୋଡ଼େ ଶରୀର ,

ଥୁରୁ ଥୁରୁ ଶୀତ

ଥରାଉଛି ଦେହ

ଜୀବନ ବାହୁଛି ଫକୀର ।

ରେଶମ ପଶମ

ଭିତରେ ଉଷୁମ

ଟାଣୁ ଥାନ୍ତି ଥିଲାବାଲାଏ ,

ଅଭାବୀ ମଣିଷ

ଆସିଲେ ପଉଷ

ଛିଣ୍ଡା କତରାକୁ ମେଲାଏ ।