ଏତ ରାଜନୀତି ଖେଳ
ଏତ ରାଜନୀତି ଖେଳ
ରାଜନୀତି ଏଠି କାଗଜ କଲମେ
ହୋଇଯାଏ ଏଠି ବନ୍ଦି
ଯୋଜନା ପରେ ଯୋଜନା ଏଠି
ପ୍ରଚାର ସର୍ବସ୍ବ ହୋଇ ମାଡିଚାଲେ
ଏ ଦେଶର ଗଳି କନ୍ଦି ।
ଝିଅ ପଢାଅ ଝିଅ ବଢାଅ
କାଗଜ କଲମେ ରୁହେ
ସ୍କୁଲ କକ୍ଷରେ ନିରୀହ ଝିଅର
କୁମାରୀତ୍ୱ ହଜି ଯାଏ ।
ପ୍ରଚାରରେ ଚାଲେ ମହିଳା ସୁରକ୍ଷା
ହେଲେ ଶକ୍ତି ହୀନ ଆଜି ନାରୀ
ଦିନ ଆଲୁଅରେ ଅସୁରକ୍ଷିତ ସେ
ଅକାଳରେ ଯାଏ ଝରି ।
ନିଜ ଲୋକ ଶବ କାନ୍ଧରେ ବୋହି
ମଣିଷ ଯୋଉଠି ଚାଲେ
ରାଜନୀତି ଖେଳ ଦେଖ ହୋ ବନ୍ଧୁ
ଏଠି ଯୋଜନାରେ ହରିଶ୍ଚନ୍ଦ୍ର ଗାଡ଼ି ଚାଲେ ।
ନଗଡାର ଶିଶୁ ଅପପୃଷ୍ଟି ପାଇଁ
ହୁଏ ଏଠି ଜରା ଜୀର୍ଣ୍ଣ
ପାଞ୍ଚ ଟଙ୍କାରେ ନିରାମୟ ଖାଦ୍ୟ
ହେଲେ ଭୋକିଲା ପାଏନି ଅନ୍ନ
ବିକାଶ ଟା ଏଠି କାଗଜ ପୃଷ୍ଠାରେ
ନଥାଏ ତା' ଚିହ୍ନ ବର୍ଣ୍ଣ ।
ନେତାଙ୍କ ଦରମା ବଢ଼ି ବଢ଼ି ଚାଲେ
ଚାଷୀ କାନ୍ଦେ ଲୁହ ଢାଳି
ସେଥିପାଇଁ କାହା ନିଦ ଭାଙ୍ଗେ ନାହିଁ
ଚାଷୀଟି ପଡଇ ବଳି ।
କିଏ ଦିଏ ଏଠି ସ୍ୱଜଳା ଯୋଜନା
କିଏ ପୁଣି ଦିଏ ଭତ୍ତା
ଦାଦନ ଖଟଇ ଗରୀବ ଯୋଉଠି
ପୁରାଇବା ପାଇଁ ପେଟ ,,
ଭାଇ ଏତ ରାଜନୀତି ଖେଳ
ଭୋଟ ଆସିଲେ ସଭିଏଁ ଆସି
ଯୋଗାଡନ୍ତି ନିଜ ବଳ ।