ଏକ ହିଁ ଈଶ୍ବର

       

ଏକ ହିଁ ଈଶ୍ବର

ସେ ସତ୍ୟ ଶିବ ସୁନ୍ଦର

ଅନାଦି ଅନନ୍ତ ଅବ୍ୟୟ ଅକ୍ଷୟ ଅବିନେଶ୍ଵର

ଶାଶ୍ଵତ ଚିରନ୍ତନ ପୂର୍ଣ୍ଣ ବ୍ରହ୍ମ ସୃଷ୍ଟିର ଆଧାର

ସେ ପରମାତ୍ମା ବ୍ରହ୍ମା ବିଷ୍ଣୁ ମହେଶ୍ୱର l

ତ୍ରିଶକ୍ତି୍ର ଏକ ସମାହାର

ଏକ ହିଁ ଈଶ୍ବର ସେ ଇଚ୍ଛାମୟ

ତାଙ୍କ ଇଚ୍ଛାରେ ଚାଲେ ସଂସାର

ସେ ସୃଷ୍ଟିକର୍ତ୍ତା ଏ ସାରା ବିଶ୍ଵ ବ୍ରହ୍ମାଣ୍ଡର l

ସର୍ବ ଶକ୍ତିମାନ ସର୍ବ ବିଦ୍ୟମାନ ସର୍ବଜ୍ଞ ଠାକୁର

ଦିଅନ୍ତି ସୁରକ୍ଷା ରଖନ୍ତି ପାଳି ପୁଣି କରନ୍ତି ସଂହାର

ଏକରୁ ହୁଅନ୍ତି ଅନେକ, ଅନେକରୁ ଏକାକାର

ବ୍ୟଷ୍ଟିର ସମଷ୍ଟି ସେ ,ଏକ ହିଁ ଈଶ୍ବର

ସେ ସ୍ଥାବର ଅସ୍ଥାବର ପ୍ରାଣୀର ପ୍ରାଣେଶ୍ଵର l

କୀଟ ପତଙ୍ଗଠାରୁ ନରନାରୀ ଜୀବଜନ୍ତୁ୍ଙ୍କର

ବୃକ୍ଷଲତା ଜଡ଼ ଚେତନର ଆଦି ସୂତ୍ରଧର 

ସେ ପ୍ରକୃତି ପୁରୁଷର ନିୟନ୍ତା ଅଖଣ୍ଡ ମଣ୍ଡଳାକାର

ତାଙ୍କ ପ୍ରକାଶରେ ପ୍ରକାଶିତ ସାଗର ଅମ୍ଵର l

ସବୁଠାରେ ତାଙ୍କର ସ୍ଵାକ୍ଷର ଏକ ହିଁ ଈଶ୍ବର

ସଂସାରରେ ଜନ୍ମ ଲଭି ମଣିଷ ନିମିତ୍ତ ମାତ୍ରର

କରେ ନାହିଁ ଶାନ୍ତିଦାୟୀ ସ୍ବତନ୍ତ୍ର ବିଚାର

ଅଜ୍ଞାନତା ବଶତଃ କରେ କେବଳ ଅହଂକାର l

ଯାହାଙ୍କଠାରୁ ଆସିଛି ସେ ପାଇ ପୂର୍ଣ୍ଣ ଆକାର

ତାଙ୍କୁ ଭୁଲି ହୁଏ ସ୍ଵାର୍ଥପର ଡାକି ଆଣେ ଅନ୍ଧକାର 

ଈଶ୍ଵରଙ୍କୁ କରି ଭାଗ ଭାଗ ଚଳାଏ ସ୍ଵେଚ୍ଛାଚାର

ସାମ୍ପ୍ରଦାୟିକତାରେ ନିଜର କାୟା କରେ ବିସ୍ତାର l

କାମନାର ନିଆଁରେ ଜଳି ଜଳାଏ ଭବ ସଂସାର

କରେ ହିଂସା ଦ୍ୱେଷ ଅନ୍ୟାୟ ଅତ୍ୟାଚାର

ଆତଙ୍କରେ ଆତଙ୍କିତ ହୁଏ ସଚରାଚର 

ନୀରିହ ନିଷ୍ପାପ ଅସହାୟତାରେ କରେ ଚିତ୍କାର l

ଅର୍ଥ ହୁଏ ଅନର୍ଥ ଜୀବନ ହୁଏ କୁତ୍ସିତ କଦାକାର

ଚାଲେ ହିଂସ୍ର ଶତ୍ରୁତାରେ ରକ୍ତପାତର ମହାସମର

ଅଧର୍ମ ହୁଏ ପରାଜିତ ଜୟ ହୁଏ ଧର୍ମର

ସବୁ ଦେଖନ୍ତି ଈଶ୍ଵର କରନ୍ତି ନିରପେକ୍ଷ ବିଚାର l

କର୍ମ ନେଇ ମଣିଷ ଫଳ ପାଏ ତାହାର

ଅନୁଭବ କରି ରହିଥାଏ ଯିଏ ନୀରବ ନିର୍ବିକାର

ଶ୍ରମ ସାଧନାରେ ଭରସା ବିଶ୍ଵାସ କରେ ନିରନ୍ତର

ସବୁଠାରେ ଦେଖେ ସେ ଏକ ହିଁ ଈଶ୍ବର l

ପାଏ ଶାନ୍ତି ତୃପ୍ତି ଜୀବନକୁ ଗଢ଼େ ସରସ ସୁନ୍ଦର  

ମହୀ ମଣ୍ଡଳରେ ମାନବ ଜନ୍ମ ତାର ହୁଏ ସାକାର

ଯୁଗେ ଯୁଗେ ଅଛନ୍ତି ସେ ଏକ ହିଁ ଈଶ୍ବର ।