ଏକ ହିଁ ଈଶ୍ୱର

ଏକ ହିଁ ଈଶ୍ୱର ଜଗତ ଠାକୁର

ବ୍ରହ୍ମା ବିଷ୍ଣୁ ମହେଶ୍ବର ।

ତୁମରି ଇସାରା ଆଦେଶରେ ପ୍ରଭୁ

ଆମେ ହିଁ ସଚରାଚର ।।

ସୃଷ୍ଟିକର୍ତ୍ତା ତୁମେ ତ୍ରାଣକର୍ତ୍ତା ତୁମେ

ତୁମେ ହିଁ କର ସଂହାର ।

ତୁମେ ପିତାମାତା ତୁମେ ପ୍ରାଣଦାତା

ବନ୍ଧୁ ସଖା ସହୋଦର ।।

ତୁମ ଶୁଭଦୃଷ୍ଟି ପାଇ ବଞ୍ଚିଅଛୁ

ଗଢ଼ିଛ ତୁମେ ସଂସାର ।

ଦୟା କ୍ଷମା ଶାନ୍ତି ଦେଉଥାଅ ନିତି

କରି ସଦା ସୁବିଚାର ।।

ଅମାପ ଭକ୍ତିରେ ପୂଜା କରୁଥିବୁ

ଦିଅ ଶକ୍ତିର ସମ୍ଭାର ।

ସୁଖ ସମୃଦ୍ଧିରେ ଜୀବନଯାପନେ

କର ଏ ଭବୁ ଉଦ୍ଧାର ।।

ତୁମ ଆଶୀର୍ବାଦ ଆମପାଇଁ ହେଉ

ସୁଖଶାନ୍ତିର ଭଣ୍ଡାର ।

ପ୍ରାର୍ଥନା କରୁଛୁ ଦୃଢ଼ ଭକ୍ତିଭରେ

ଅନ୍ୟାୟଠୁଁ କର ଦୂର ।।

ତୁମେ ନ୍ୟାୟ ,ସତ୍ୟ ,ସୁଖ ,ଶାନ୍ତି ଦାତା

ତୁମେ ଏକ ହିଁ ଈଶ୍ୱର ।

ପାଇ ତବସ୍ପର୍ଶ ଶକତି ଆଶିଷ

ଏ ସଂସାରୁ ପାରି କର ।।