ଦେବକୀନନ୍ଦନ ଯଶୋଦାନନ୍ଦନ
ଦେବକୀନନ୍ଦନ ଯଶୋଦାନନ୍ଦନ
![](https://cdn.storymirror.com/static/1pximage.jpeg)
![](https://cdn.storymirror.com/static/1pximage.jpeg)
ଦେବକୀନନ୍ଦନ ଯଶୋଦାନନ୍ଦନ ହେଲେ ଅତ୍ୟନ୍ତ ହିଁ ମନୋହର,
ଗୋକୁଳଚନ୍ଦ୍ର ବ୍ରଜବିହାରୀ ହେଲେ ଗୋକୁଳର ନବନୀତଚୋର,
ତାଙ୍କର ଶୈଶବ ଲୀଳା ସ୍ୱୟଂ ଦର୍ଶାଏ ସୁଖପ୍ରଦ ସାନନ୍ଦ-ଲହର,
ଗୋପାଳ ହୋଇ ବ୍ରଜକିଶୋର କରିଲେ ଗୋବର୍ଦ୍ଧନ ସମାହାର |୧|
ଗୋପୀକାଙ୍କ ପାଇଁ ମୁରଲୀଧର ହେଲେ ରସିକ ନାଗର,
ନନ୍ଦନନ୍ଦନ ବଣ୍ଟନ କରି ଚାଲିଲେ କେବଳ ପ୍ରେମସାଗର,
ନିଜେ ହେଲେ ରାଜନୀତି ନୀତିଶାସ୍ତ୍ର ଧର୍ମଶାସ୍ତ୍ରର ଭଣ୍ଡାର,
ଜଗପତି ହେଲେ ଏହି ଅନନ୍ତ ଜଗତର ମୂଳାଧାର ସୂତ୍ରଧାର |୨|
କହ୍ନେଇ ହେଲେ କୃଷ୍ଣପ୍ରେୟସୀ ରାଧିକାଙ୍କର ପ୍ରିୟତର ବଂଶୀଧର,
ସୁଦାମାଙ୍କ ପାଇଁ ବାଲ୍ୟମିତ୍ର ରୂପରେ ହେଲେ ଉତ୍କୃଷ୍ଟ ଉପହାର,
ମାତୁଳ ନିର୍ଦ୍ଦୟ କଂସର ବଧ ଦ୍ୱାରା କରିଲେ ମଥୁରାପୁରୀର ଉଦ୍ଧାର,
ଉଦ୍ଦଣ୍ଡ ସ୍ୱେଚ୍ଛାଚାରୀ ଶିଶୁପାଳର ସଂହାର କରିଲେ ଆମର ଚକ୍ରଧର |୩|
ଅବସର ଅନୁସାରେ ପାଣ୍ଡବଙ୍କର ଶାନ୍ତିଦୂତ ହେଲେ ଲୀଳାଧର,
ତାଙ୍କୁ ସର୍ବଦା ହିଁ ଶିଖାଇଲେ ସମୟୋଚିତ ସମୁଚିତ ସଦାଚାର,
କୁରୁକ୍ଷେତ୍ର ରଣକ୍ଷେତ୍ରରେ ପାର୍ଥସାରଥୀ ହେଲେ ଯେ ପୀତାମ୍ବର,
ନିଜ ବିଶ୍ୱଦର୍ଶନ ଦ୍ୱାରା ବନ୍ଦନୀୟ ଜଗଦ୍ଗୁରୁର ନେଲେ ଅବତାର |୪|
ବକ୍ତା ଭାବରେ ଭବ୍ୟ ଭଗବଦ୍ଗୀତାର ବ୍ରହ୍ମଜ୍ଞାନର ହେଲେ ଆଧାର,
ତାଙ୍କର ପାଞ୍ଚଜନ୍ୟ ଶଙ୍ଖର ଜୟଘୋଷର ସଦା ହୁଏ ଜୟ ଜୟକାର,
ଯୁକ୍ତାଯୁକ୍ତ ପଥପ୍ରଦର୍ଶନ ଲାଗି ଶ୍ରୀକୃଷ୍ଣ ସଦା ହେଲେ ଆତୁର ଅଗ୍ରସର,
ପ୍ରତି ପର୍ଯ୍ୟାୟରେ ହୋଇଛି ଶ୍ରୀଜଗନ୍ନାଥଙ୍କ ନୂତନ ରୂପ ସହ ସାକ୍ଷାତ୍କାର |୫|