ଡୋରି

 

 ଅଲେଖା ଦସ୍ତାବିଜଟେ ତୁ ସତେ

  ମୋ ହୃଦୟର ପୃଷ୍ଠାରେ ସାଇତା

କେବେ ତୁ ମିଠା ମଳୟର ସ୍ପର୍ଶ

  ପୁଣି କେବେ ନିଝୁମ ରାତିର କବିତା

ସେ କୁନୁମୁନିଆ ଖରାବେଳେର 

 ଆମ ଲୁଚାଚୋରା କିତିକିତି ଖେଳ

ଆଉ ପୁଣି କୁଆଁର ପୁନେଇଁ ରାତିରେ

ପୁଚି , ପାଣି ପାହାଡ଼ ,ବୋହୁଚୋରି ମେଳ

ଡହଡହ ଖରାଛୁଟି ବେଳର ସେଇ 

 ଆମ୍ବ , ଲଙ୍କା ,ଲୁଣ ପାଗ ରସାଳ ସୁଆଦ 

ତୋ ସହ ଭଲ ଲାଗେ ଜୀବନର ସବୁ

 ଖଟା ମିଠା ପିତା କଷା ଖାଇବା ବରାଦ

ଆମ ଟୁଙ୍ଗୀ ଘର କୁନି ଖଟ ଆଉ 

 ସେଇ ଲୁଡୁପାଲି ସହ ତୋ ମୋ କଳି

ସେ ବିଭୋର ପିଲାଦିନ ହସ କାନ୍ଦ 

 ଆତ୍ମୀୟତାର ଋତୁମତୀ ପ୍ରୀତି ଅଳି 

ଖୁବ୍ ମନେ ପଡେ ସଖୀ ଆମ ଅତୀତ

 ଯେଉଁଠି ବାନ୍ଧି ଆସିଛେ ସଖ୍ୟତା ଡୋରି

ପୁଣି ଥରେ ଜିଇଁବାର ଇପ୍ସା ଅଛି ମନେ

ଆ ପୁଣି ଯିବା ସେଇ ପିଲାଦିନକୁ ଫେରି