ଚିତ୍ର ଚରିତ - 53 କବିତା: କବି-ଲେଖକ-କଳାକାର
ଚିତ୍ର ଚରିତ - 53 କବିତା: କବି-ଲେଖକ-କଳାକାର
କବି-କଳାକାର ସାହିତ୍ୟ ସେବକ ସମାଜର ସଂସ୍କାରକ,
ନପାଇ ମଜୁରି ଦିଅନ୍ତି ଅନେକ ଈଶ୍ଵରଙ୍କ ପାଖଲୋକ |
ଯନ୍ତ୍ରୀ-ମନ୍ତ୍ରୀ ବୃତ୍ତିଧାରୀ ବୁଦ୍ଧିଜୀବୀ ଓକିଲ ଡାକ୍ତର କୁହ,
କଲମ ଛୁଇଁଲେ କାଗଜ କାଢିଲେ କହନ୍ତି-ପଇସା ଥୁଅ |
ଫାଇଲ ଖୋଲିଲେ କିରାଣୀ କହୁଛି-ଖର୍ଚ୍ଚା ଟିକେ ବେଶି ଦେବ,
ଅଫିସର କହେ-ଆଜି ସଞ୍ଜବେଳେ ଘରକୁ ଟିକେ ଆସିବ |
ମୂଲିଆ ମଜୁରୀ ବଢିବଢି ଯାଏ କଥା କହିଲେ ପଇସା,
ଦୀକ୍ଷାଦେବା ନାମେ ଧନ ଠକିନେବା ଠକବାବାଙ୍କ ବେଉସା |
କଳାକାର ଶିଳ୍ପୀ ଖଟିଖଟି ମରେ ତାଳିମାରୁ ତାଙ୍କପାଇଁ,
ସମସ୍ତଙ୍କ ପାଇଁ ଧନ ଲୋଡ଼ା ସିନା କବି ମରେ ଖଡ଼ାଖାଇ |
ଲେଖିବା ଛାପିବ ମାଗଣା ବାଣ୍ଟିବ ଲେଖକ ତା' ଜମି ବିକି,
କଳାକାରଟିଏ କଳଙ୍କ ମାଖିବ ଦୋକାନରୁ ଖାଇ ବାକି |
ଧନ୍ୟ ଏ' ସମାଜ ଧନ୍ୟ ଏ' ବ୍ୟବସ୍ଥା ଧନ୍ୟ ଆମର ଜନତା,
ଯିଏ ଆମପାଇଁ ଲେଖୁଛି ଭାବୁଛି ନାହିଁ ତା'ର ଛତା-ଜୋତା |