ଚିକିତ୍ସା ବିଜ୍ଞାନୀ

ପ୍ରାଣୀ ବିଜ୍ଞାନର     ଅଧ୍ୟୟନେ ଯଦି

ପ୍ରସ୍ତୁତିରେ ଯତ୍ନ ନେବା

ଡାକ୍ତରୀ ପରୀକ୍ଷା   ପ୍ରତିଯୋଗିତାରେ

ହୁଏତ ଉତ୍ତୀର୍ଣ୍ଣ ହେବା ।

ବାସ୍ତବରେ ଯଦି     କରିବାର ଥାଏ

ପର ଉପକାରେ ସେବା

କଷ୍ଟସାଧ୍ୟ ବୋଲି    ମନକୁ ନିବେଶି

ଅଧିକ ଗୁରୁତ୍ଵ ଦେବା ।

ସ୍ବାସ୍ଥ୍ୟ ସମସ୍ୟାର    ବିଭକ୍ତିକରଣେ

ପ୍ରାସଙ୍ଗିକ ପ୍ରତିକାରେ

ନିର୍ଦ୍ଧାରିତ ଅଛି      ବିଭିନ୍ନ ବିଭାଗ

ଯୋଗ୍ୟତାର ଅନୁସାରେ ।

ଅଧ୍ୟୟନ ପରେ      ଦକ୍ଷତାର ସହ

ବିଶ୍ବେ କରି ଗବେଷଣା 

ଆମରି ଦେଶର     ଚିକିତ୍ସାବିଜ୍ଞାନୀ

ସର୍ବୋତ୍ତମ ଭାବେ ଗଣା ।

ପ୍ରତିକାର ସହ     ପ୍ରତିଷେଧ ପାଇଁ

ଔଷଧ ନିର୍ମାଣ ଲାଗି

ଗବେଷଣାଗାରେ    ପରୀକ୍ଷା କରନ୍ତି

ଦୀର୍ଘକାଳ ଯାଏଁ ଜାଗି ।

ରୋଗରେ ପୀଡିତ  ଲୋକଙ୍କର ପାଇଁ

ନଥାଏ ବିକାର ଘୃଣା

ସମାଜ ନିମନ୍ତେ    ଦାୟିତ୍ୱ ନିର୍ବାହେ

କରି ନଥାନ୍ତି ବି ଊଣା ।

ଜୀବନ୍ତ ଯନ୍ତ୍ରର     ମରାମତି କାର୍ଯ୍ୟ

ସହଜ ନୁହଁଇ ଏତେ

ଶୁଝି ପାରିବାନି     ଅବଦାନ ତାଙ୍କ

ପ୍ରଶଂସା କଲେ ବି ଯେତେ ।