ଛୁଆ ବେଲର୍ ଦଶ୍ରା ଛୁଟି

ସୋର୍ ପଡ଼୍ସି ସେ ଛୁଆବେଲର୍ ଦଶ୍ରା ଛୁଟି

ଇହାଦେ ବି ସୋର୍ ପଡ଼୍ସି ଯାଇଥିଲେଁ ବି ସେ ସମିୟା ବିତି |

ଦଶ୍ରା ଛୁଟି ହେଲେଁ ଇସ୍କୁଲେଁ ଟାକ୍ସ୍ ଦେଉଥିଲେ କେତ୍ନି କେତେ

ହେଲେଁ ମନ୍ ଲାଗୁଥିସି ଗାଁ ଯିବାର୍ କେ ମତେ |

ଟାକ୍ସ୍ ନାଇଁ କଲେଁ ଇସ୍କୁଲେଁ ମାଡ଼୍ ଗେଲର୍ ଡର୍

ଇଥିର୍ ଲାଗିଁ ବିବେକ୍ କହେସି ଜଲ୍ଦି ଜଲ୍ଦି ଟାକ୍ସ୍ କର୍ |

ମୁଇଁ ଟାକ୍ସ୍ କରୁଥିଲିଁ ଜଲ୍ଦି ଜଲ୍ଦି ଯିମି ବଲିଁ ମୁଇଁ ଗାଁ

ଟାକ୍ସ୍ କରିସାର୍ଲେଁ ଗାଁ ଯୁଆ ମାମୁଁ ଘରର୍ ଭାବ୍ ପିରତୀ ପାଏବାର୍ ଲାଗିଁ ମନ୍ କରିଥିସି ଆଁ |

ଭାଏ ଜୀଉଁତିଆ ଆଘର୍ ଦିନ ମାଁ ଯାଉଥିଲା ମାମୁଁ ଘର୍

ସେଥିର୍ ଲାଗିଁ ଦଶ୍ରାର୍ ଟାକ୍ସ୍ ସାର୍ବାର୍ ଲାଗିଁ ହେଉଥିଲିଁ ହର୍ବର୍ |

ଦଶ୍ରା ଛୁଟିରେ ମାମୁଁ ଘରେଁ ଲାଗୁଥିଲା କେତ୍ନି କେତେ ମଜା

ମାମୁଁ ଘରେଁ ସମ୍କିର୍ର ସଉକ୍ ପାଇକରିଁ ମନ୍ ଟା କହୁଥିଲା ମୁଇଁ ଏକା ଇନୁ ରଜା |

ଦଶ୍ରା ଛୁଟି ଶେଷ୍ ସମିୟା ଥିଁ ହେସି ଆମର୍ ଗାଁ ଯାତ୍ରା

ମାମୁଁ ଘରେଁ ଯେତେ ପଏସା ଦେଉଥିଲେ ସେଟା ନେଉଥିଲେ ଠେଲା,ହଟେଲ୍ ,ମୀନା ବଜାର୍,ମନୋହରୀ ପସ୍ରା |

ଯାତ୍ରାର୍ ଶେଷ୍ ଦିନ ହେସି ଆମର୍ ଗାଁ ନୁ କମ୍ଗେଇ ମାଁର୍ ବଏଲ୍

ଯାତ୍ରା ଦିନ ପାଠ୍ ମୁଲ୍ ପାଠ୍ ପଢ଼ା ସବୁ କେ ମନ୍ ଦେଉଥିସି ଗେଲ୍ |

ସେ ଦିନ କିହେ ନାଇଁ ଆସୁଥିଲେ ପାଠ୍ ପଢ଼ି

ଯେନ୍ ମାନେ ନାଇଁ ଆସିଥାଇଁ ସେମାନ୍କୁ ଆଜ୍ଞାମାନେ ଗେଲ୍ ଦେଉଥିଲେ ରଡ଼ି ରଡ଼ି |