ଛେନାପୋଡ଼ ଦିବସ

ଉତ୍କଳ ଆରାଧ୍ୟ ପ୍ରଭୁ ଜଗନ୍ନାଥ

        ବଡ଼ଠାକୁର ସେ ଜଗତେ ବିଦିତ l

ଜଗତ ଦେଖନ୍ତି ବଡ଼ ଚକାଆଖି

         ଭଗତ ମାନଙ୍କୁ ରହନ୍ତି ନିରେଖି l

ନିବାସ ତାଙ୍କର ବଡ଼ ଦେଉଳରେ

      ବଡ଼ପଣ୍ଡା ତାଙ୍କ ଅଛନ୍ତି ସେବାରେ l

ବଡ଼ନେତ ତାଙ୍କ ନୀଳଚକ୍ରେ ଉଡ଼େ

       ବଡ଼ଦାଣ୍ଡେ ରଥ ଘିରି ଘିରି ଗଡ଼େ l

ରତ୍ନାକର ଜେମା ବଡ଼ ଠାକୁରାଣୀ

     ଦେବୀ ପଦ୍ମାଳୟା ତାଙ୍କର ଘରଣୀ l

ଜଗତେ ବିଖ୍ୟାତ ଭାରି ବଡ଼ଖିଆ

      ଷାଠିଏ ପଉଟି ଭୋଗ ତା'ର ଥୁଆ l

ଉତ୍କର୍ଷ କଳାର ଦେଶ ତା' ଉତ୍କଳ

     ମହୋଦଧି ତା'ର ଆନନ୍ଦେ ଉଦ୍ବେଳ l

ସବୁ ଅଟେ ତା'ର ଓଡ଼ିଶାରେ ବଡ଼

     ବଡ଼ ଅଟେ ପୁଣି ଆମ ଛେନାପୋଡ଼ l

ଛେନାପୋଡ଼ ସ୍ୱାଦ ପାଇଛି ଯେ ଥରେ

   ଭୁଲିବ ନାହିଁ ସେ କେବେ ଜୀବନରେ l

ମସଲା ତୈଳ ହୀନ ମିଠା ସେହି

     ମିଷ୍ଟ ପଣେ ତା'ର ଆନ କେହି ନାହିଁ l

ଦିନେ ଦୁଇ ଦିନ ତାଜା ରହିଥାଏ

      ବ୍ୟୋମଯାନ ଚଢ଼ି ବିଦେଶକୁ ଯାଏ l

ମିଠା ଗୋଟି ଖାଣ୍ଟି ଓଡ଼ିଆ ସର୍ବସ୍ବ

      ହର୍ଷେ ପାଳ ଛେନାପୋଡ଼ର ଦିବସ l