ବ୍ୟର୍ଥ ଯିବନାହିଁ ନିଷ୍ଠା

ଅଦୃଶ୍ୟ ଦାନବ କ୍ରୁର ଲୀଳାରେ ଯେ କରାୟତ୍ତ ସାରା ବିଶ୍ୱ

ରକ୍ତ ରଞ୍ଜିତ ଧରିତ୍ରୀର ବକ୍ଷ ସାଜିଲାଣି ଆଜ ନିଃସ୍ୱ

ଚନ୍ଦ୍ରର ପୃଷ୍ଠରେ ପାଦଥାପିଥିବା ମନୁଷ୍ୟର ଶତଚେଷ୍ଟା

ହାରିଯିବୁ ନାହିଁ ହରାଇବୁ ନିଶ୍ଚେ ବ୍ୟର୍ଥ ଯିବନାହିଁ ନିଷ୍ଠା ।

ନୁହଁ ଆମେ ଭୀରୁ ଡରିଯିବୁ ନାହିଁ ଦେଖି ତା'ର ଭୟାବହ

ସଚେତନ ଅଛୁ ସତର୍କ ରହିବୁ ଭାଙ୍ଗିଦେବୁ ଟାଣ ମୁହଁ 

ପରିଷ୍କାର ପରିଚ୍ଛନ୍ନ ରହୁଅଛୁ ପାଳୁଅଛୁ ସଙ୍ଗରୋଧ

ଆତଙ୍କ ପଥକୁ ମିଳିମିଶି ସର୍ବେ କରିଅଛୁ ଅଵରୋଧ ।

ଆସିବ ପ୍ରତ୍ୟୁଷ ନବରବି କରେ ଉଦ୍ଭାସିତ ହେବ ମହୀ

ଦାନବର ବଳ ହେବ ଦୁରୁବଳ ଶକତି ପ୍ରମାଣ ପାଇ

ବୁଦ୍ଧି କୌଶଳର ପ୍ରୟୋଗରେ ଗଢା ଅସ୍ତ୍ର ପ୍ରହାର ବଳେ

କ୍ଷିତିରୁ ନିଶ୍ଚିହ୍ନ ହୋଇବ ଅଧମ ଅସୀମ ଆକାଶ ତଳେ ।

ଆସିଛି ଏମିତି ଅନେକ ବିପଦ ହୋଇନାହୁଁ ଧୈର୍ଯ୍ୟହରା

କରିବୁ ସମର ଜିଣିବୁ ଶତ୍ରୁକୁ ହସିଉଠିବ ମା' ଧରା ।