ବର୍ଷା
ବର୍ଷା
ଝିପ୍ ଝିପ୍ ଝିପ୍ ବରଷା ଝରେ
ଚିକ୍ ମିକ୍ କରି ବିଜୁଳି ମାରେ
ଘଡଘଡି ମାରେ ରହି ରହି
ଇନ୍ଦ୍ରଧନୁର ସପ୍ତ ରଙ୍ଗ
ସଭିଙ୍କର ମନ ନିଏ ମୋହି ll
ଧରଣୀ ବୁକେ ବରଷା ରାଣୀ
ଆସଇ ଯେବେ ଓଢଣୀ ଟାଣି
ସାଜିଣ ବଧୂ ବେଶେ
ଦେଖାଇ ଥାଟ ସବୁଜ ପାଟ
ପିନ୍ଧି ମୁରୁକି ହସେ ll
ବରଷା ଭିଜା ମୋ ଗାଁ' ମାଟି
ବାସନା ତା'ର ଯାଏ ଚହଟି
ମନରେ ଆଣେ ଖୁସି
ଗାଁ' ର ଲୋକେ କରନ୍ତି ମେଳି
ଦାଣ୍ଡ ପିଣ୍ଡାରେ ବସି ll
ପାଣିରେ ବୁଡ଼େ ଗହୀର ପାଟ
ବିଲ ବାଡ଼ି ଆଉ ପୋଖରୀ ତୁଠ
ନଦୀରେ ଆସେ ବଢ଼ି
ରାତି ଅଧରେ ବେଙ୍ଗ ବେଙ୍ଗୁଲି
ଛାଡ଼ନ୍ତି ଖାଲି ରଡି ll
ଧାରା ଶିରାବଣ ଝଡି ବରଷା
ଚାଷୀ କୁଳରେ ଜଗାଏ ଆଶା
ଚଷା ପୁଅ ଗାଏ ଗୀତ
ଧାନ ତଳି ରୋଇ ଅତି ଯତନରେ
ଉଠିଆ କରେ ତା' କ୍ଷେତ ll
ବରଷା ଟିକେ ଗଲାରୁ ଛାଡି
କାଲୁଆ ପବନ ଆସଇ ମାଡି
ଦେହକୁ ଲାଗଇ ଶୀତ
ଗହୀର ବିଲୁ ଭାସି ଆସଇ
ଚାଷୀ ଭାଇର ଗୀତ ll
ନିଦାଘ ଶେଷେ ଉତ୍ତପ୍ତ ଧରା
ତକ୍ଷଣେ ପାଇ ବାରିର ଧାରା
ମେଣ୍ଟାଏ ତା'ର ତୃଷା
ଆଶ୍ୱସ୍ତ କରେ ଜୀବଜଗତ
ନାଁ' ଟି ତା'ର ବର୍ଷା ll