ବୋଉ କଥା ମନେ ପଡେ

ବୋଉ ଆଜି ମୋର କାହିଁକି କେଜାଣି

ତୋର କଥା ମନେ ପଡେ

ସକାଳୁ ସକାଳୁ ଚଉରା ମୂଳରେ

ଦୀପ ଜଳା ମନେ ପଡେ (1)

ତୁଳସୀ ମୂଳରେ ଗୁଣ୍ଡ ମୁରୁଜରେ

ଜାଗା ଛବି ମନେ ପଡେ

ଦିନ ଗଡିଗଲେ ତୋ ହବିଷ ଭାତ

ଶାଗ ଭଜା ମନେ ପଡେ (2)

ସଞ୍ଜ ନଇଁ ଗଲେ ଆକାଶର ଦୀପ

ତୋ ଆଳତି ମନେ ପଡେ

ତୋ ସ୍ନେହ ଆଦର ପରଶ ଶାନ୍ତିର

ଆଜି ଭାରି ମନେ ପଡେ (3)

ଜାଣିଛି କେବେବି ଆଉ ଫେରିବନି

ଗଲା ଦିନ ଗଲା କଥା

ବୋଉ ତୋର ବିନା ଖାଲି ଖାଲି ଘର

ଚାରି ଆଡେ ନୀରବତା (4)

ଗାଁଆ ବାଡ଼ି ଘର ଲାଗେନା ନିଜର

ମନ ହୁଏନା ଯିବାକୁ

ତୋ କଥା ଭାବିଲେ ଆଖି ମୋର ପୁରେ

ଭାବେ ଥରେ ଫେରିବାକୁ (5)