ବଣ ସଭା
ବଣ ସଭା
ବଣ ରାଇଜରେ ସିଂହ ରାଜା ଆଜି
ଏକତ୍ରିତ କରି ପଶୁ ପକ୍ଷୀକୁ ।
ଆୟୋଜନ କଲେ ସଭା ଜଙ୍ଗଲରେ
ମନୁଷ୍ୟ ଠାରୁ ରକ୍ଷା ପାଇବାକୁ ।।
ଆରମ୍ଭ କରି ସେ ସଭାକାର୍ଯ୍ୟ ଆଗେ
କହିଲେ ସମସ୍ତ ଦୁଃଖର କଥା ।
ବଣ ରାଇଜରେ ମନୁଷ୍ୟ ମାନଙ୍କ
ଅତ୍ୟାଚାର ଆଜି ଦେଉଛି ବ୍ୟଥା ।।
ନିର୍ଭୟରେ ଏଠି ଶିକାର କରି ସେ
ଖାଉଛନ୍ତି ଜୀଵ ଜନ୍ତୁକୁ ମାରି ।
ଡରାଉଛନ୍ତି ଆମ ମାନଙ୍କୁ ପୁଣି
ଆଧୁନିକ ଅସ୍ତ୍ର ଶସ୍ତ୍ରକୁ ଧରି ।।
କାଲି ମୁଁ ଦେଖିଲି ଗୋଟିଏ ସ୍ଥାନରେ
ଆସିଥିଲେ ବହୁ ମାନବ ହସି ।
ଶିକାର କରିଲେ ହରିଣ ଗୋଟିଏ
ନିଆଁରେ ପୋଡିଲେ ଆନନ୍ଦେ ବସି ।।
ସେ ନିଆଁ ଲାଗିଲା ସାରା ଜଙ୍ଗଲରେ
ଏବେ ବି ଜଳୁଛି ଦକ୍ଷିଣ ଦିଗେ ।
ବର୍ଷା ଯୋଗୁଁ ଆମେ ବଞ୍ଚିଗଲେ ସିନା
ନହେଲେ ମରନ୍ତେ ସଭିଏଁ ଆଗେ ।।
ସିଂହ ରାଜାଙ୍କର କଥା ସରିନାହିଁ
ଆସିଲା ଗୋଟିଏ ଭଲ୍ଲୁକ ଧାଇଁ ।
ଜଳି ଯାଇଥିଲା ଅଧା ଶରୀର ତା'
କାନ୍ଦୁଥିଲା ସିଏ ବିକଳ ହୋଇ ।।
ଦେଖି ତା' ଶରୀର ପଶୁ ପକ୍ଷୀ ଗଣ
ପ୍ରଚଣ୍ଡ ରାଗରେ ଉଠିଲେ ସବୁ ।
କହିଲେ ରାଜାଙ୍କୁ ଯିବୁ ଏବେ ଆମେ
ମଣିଷ ସମାଜ ଧ୍ୱଂସ କରିବୁ ।।
ମାନବଙ୍କ ଠାରୁ ପ୍ରତିଶୋଧ ନେବୁ
ଦେଖାଇ ଦେବୁ ହେ ଆମରି ବଳ ।
ଅନୁମତି ଯଦି ମିଳେ ରାଜାଙ୍କର
ଆମେ ଯିବୁ ହୋଇ ସଭିଏଁ ମେଳ ।।
ହସ୍ତୀ ଥିଲା ପାଖେ ଦେଲା ସେ ଉତ୍ତର
ଉଚିତ କାର୍ଯ୍ୟ ଏ ନୁହେଁ ଆମର ।
ଆମ ଏହି ସଭା ବିଷୟରେ ଆଜି
ମାନବଙ୍କୁ ଦିଆଯାଉ ଖବର ।।
ନଷ୍ଟ କରିବେନି ଆମ ରାଇଜକୁ
ଆମକୁ ସେମାନେ ମାରିବେ ନାହିଁ ।
ଯଦି ନ ବୁଝିଲେ ବାଧ୍ୟ ହେବା ଆମେ
ଆକ୍ରମଣ ତାଙ୍କୁ କରିବା ପାଇଁ ।।
ହାତୀର କଥାକୁ ସବୁ ପଶୁ ପକ୍ଷୀ
ସମର୍ଥନ କଲେ ରାଜାଙ୍କ ସହ ।
ବାର୍ତ୍ତା ପଠାଇଲେ ମାନବ ଗଣକୁ
ଜଣାଇଲେ ନିଜ ହୃଦୟ କୋହ ।।
ଧମକ ଭରା ସେ ଚରମ ନିଷ୍ପତି
ମାନବ କର୍ଣ୍ଣରେ ଶୁଣାଇ ଦେଇ ।
ସଭା ଶେଷ କରି ଚାଲିଗଲେ ସର୍ବେ
ଆଗାମୀ ଦିନର ପ୍ରସ୍ତୁତି ପାଇଁ ।।